सन् १९९६ को छैटौं विश्वकप भारत, पाकिस्तान र श्रीलंकाले संयुक्त रूपमा आयोजना गरेका थिए । कोलकाताको इडेन गार्डेन रंगशालामा आयोजक भारत र श्रीलंकाबीच सेमिफाइनल खेल भएको थियो । रंगशाला भारतीय समर्थकले खचाखच भरिएको थियो ।
टस हारी पहिले ब्याटिङको निम्तो पाएको श्रीलंकाले आठ विकेट गुमाएर २५१ रन बनायो । जवाफी ब्याटिङमा ओर्लिएको भारतले भने अत्यन्तै निराशाजनक प्रदर्शन गर्यो । भारतले केवल आठ रनको कुल स्कोरमा ओपनर ब्याट्सम्यान नवजोत सिद्धुलाई गुमाएको थियो । त्यसपछि अर्का ओपनर सचिन तेन्दुलकर र सञ्जय मान्जरेकरले टोलीको स्कोरलाई ९८ रनसम्म पुर्याए । ६५ रन बनाउँदै तेन्दुलकर दोस्रो विकेटका रूपमा पेभेलियन फर्किएपछि भने भारतीय समर्थक आक्रोशित बन्न पुगे ।
त्यसपछि एकपछि अर्को गर्दै लगातार भारतको विकेट खस्न थाल्यो । केवल १२० रनमा भारतको आठौं विकेट खसेपछि घरेलु समर्थकले धैर्य गुमाए । त्यसपछि भारतीय समर्थक नाराबाजीमा ओर्लिए । उनीहरूले रंगशालामा तोडफोड गरे, आगो लगाए अनि मैदानमा बोतल फाल्न थाले ।
सोही कारणले खेल स्थगित हुन पुग्यो र श्रीलंकालाई विजयी घोषित गरियो । उक्त खेलमा क्लाइभ लोयड म्याच रेफ्री थिए । खेल स्थगित हुँदा भारतका विनोद काम्बली १० र अनिल कुम्बले शून्य रनमा क्रिजमा थिए । उक्त विश्वकपको उपाधि पनि श्रीलंकाले नै जित्यो ।
![Dirghayu Ads](https://sudurpashimkhabar.com/wp-content/uploads/2024/06/Dirghayu.gif)