सिवाईसी अत्तरियाले तेस्रो संस्करणको रुस्लान धनगढी प्रिमियर लिग (डीपीएल) क्रिकेटमा लगातार दोस्रो जित निकालेको छ । आज भएको खेलमा रुपन्देही च्यालेन्जर्सलाई ३९ रनले पराजित गर्दै अत्तरियाले लगातार दोस्रो जित निकालेको हो । टस जितेर पहिले ब्याटिङ गर्दै अत्तरियाले पुरै २० ओभर खेल्दै ९ विकेट गुमाएर १ सय २१ रन बनायो । अत्तरियाका लागि कप्तान दिपेन्द्रले ६७ रनको अर्धशतकीय ईनिङस खेले । ४२ बलमा अर्धशतक पुरा गरेका दिपेन्द्रले ५० बलमा १० चौका र १ छक्का प्रहार गरे । खराब सुरुवात गर्दै १६ रन जोड्दा २ विकेट गुमाईसकेको अत्तरियाका लागि कप्तान दिपेन्द्रले तेस्रो विकेटका लागि रित गौतमसंग मिलेर ५७ रनको साझेदारी गर्दै टोलीको इनिङस उकासेका थिए । रित १२ रनमा आउट भए । यस्तै अत्तरियाका सन्नी पटेल र सुवेन्धु पाण्डेले समान १२/१२ रन बनाए । रुपन्देहीका ललित सिंह भण्डारीले ३ तथा विक्रम सोवले २ विकेट लिए । बसन्त रेग्मी र पुनित मेहेराको नाम १/१ विकेट रह्यो ।
फाप्ला क्रिकेट मैदानमा दिपेन्द्र सिंह ऐरीको कप्तानीमा रहेको अत्तरियाले दिएको १ सय २२ रनको लक्ष्य सहित जवाफी ब्याटिङ गरेको रुपन्देही २० ओभरमा सवै विकेट गुमाउँँदै ८२ रनमा समेटियो । बसन्त रेग्मीको कप्तानीमा रहेको रुपन्देहीका लागि सुमित महर्जनले सर्वाधिक २२ रन बनाए । यस्तै सन्दीप सुनारले १५ तथा प्रदिप ऐरी र विक्रम सोवले समान १४/१४ रन बनाए । विनोद भण्डारी १० रनमा आउट भए । रुपन्देहीलाई सस्तैमा समेट्न अत्तरियाका सन्नी पटेल, भुवन कार्की, दिपेन्द्र सिंह ऐरी र दिपेन्द्र रावतले समान २/२ विकेट लिए ।
जितसंगै अत्तरियाले २ खेलबाट ४ अंक जोडेको छ । अत्तरियाले प्ले अफ पुग्ने सम्भावना बलियो बनाएको छ । पहिलो खेलमा अत्तरियाले धनगढी स्टार्सलाई पराजित गरेको थियो । रुपन्देहीको भने यो पहिलो हार हो । अघिल्ला दुई खेलमा लगातार जित निकालेको रुपन्देहीले ४ अंक जोडेको छ । रुपन्देहीको पनि प्ले अफ सम्भावना रहेको छ । रुपन्देहीले पहिलो खेलमा महेन्द्रनगर र दोस्रो खेलमा विराटनगरलाई हराएको थियो ।
![Dirghayu Ads](https://sudurpashimkhabar.com/wp-content/uploads/2024/06/Dirghayu.gif)