काठमाडौं । विश्वका तीन शक्तिशाली राष्ट्र अमेरिका, चीन र रुस आणविक जोखिम न्यूनीकरण, हतियार नियन्त्रण तथा विश्व शान्ति कायम गर्न सहकार्य गर्ने विषयमा सहमत भएका छन्।
चीनको सेन्जेनमा आयोजित ३३औँ एसिया–प्रशान्त आर्थिक सहयोग (एपेक) शिखर सम्मेलनका क्रममा तीनै देशका राष्ट्रप्रमुखबीच यस्तो सहमति भएको हो।
सम्मेलनको अन्तिम दिन अमेरिकी राष्ट्रपति डोनाल्ड ट्रम्प, चिनियाँ राष्ट्रपति सी जिनपिङ र रुसी राष्ट्रपति भ्लादिमिर पुटिनबीच एक घण्टाभन्दा बढी समय त्रिपक्षीय वार्ता भएको थियो।
वार्तामा आणविक जोखिम न्यूनीकरण तथा हतियार नियन्त्रणका विषयमा संवादलाई निरन्तरता दिने, विश्व ऊर्जा आपूर्ति स्थिर बनाउन प्रशोधित पेट्रोलियम पदार्थको उत्पादन बढाउने र संयुक्त राष्ट्रसङ्घमा सुधारका लागि पहल गर्ने विषयमा छलफल भएको अन्तर्राष्ट्रिय सञ्चारमाध्यमले जनाएका छन्।
चिनियाँ राष्ट्रपति सी जिनपिङले आणविक युद्ध रोक्न विश्वका सबै देशले सक्दो प्रयास गर्नुपर्नेमा जोड दिएका छन्। त्यस्तै, रुसी राष्ट्रपति पुटिनले युक्रेन युद्ध अन्त्य गर्ने विषय तीनै देशको साझा चासो रहेको बताएका छन्।
यसैबीच अमेरिकी राष्ट्रपति ट्रम्प र रुसी राष्ट्रपति पुटिनबीच छुट्टै बन्द कोठामा द्विपक्षीय वार्तासमेत भएको थियो। यद्यपि, युक्रेन युद्धलगायत विवादित विषयमा तत्काल कार्यान्वयन गर्न सकिने ठोस सहमति भने जुट्न सकेन।
‘समृद्धिका लागि एसिया–प्रशान्त समुदायको निर्माण’ भन्ने नारासहित आयोजित सम्मेलनमा २१ सदस्य अर्थतन्त्रका राष्ट्र तथा सरकार प्रमुखहरूको सहभागिता रहेको थियो।
सम्मेलनको समापनसँगै सदस्य राष्ट्रका नेताहरूले क्षेत्रीय व्यापार विस्तार, आपूर्ति शृङ्खला सुदृढीकरण तथा आर्थिक खुलापन प्रवर्द्धन गर्ने प्रतिबद्धतासहित संयुक्त वक्तव्य जारी गरेका छन्।
एपेकको ३४औँ शिखर सम्मेलन सन् २०२७ मा भियतनामको फु क्वोक टापुमा आयोजना हुने तय भएको छ।










Discussion about this post