धनगढी : डडेल्धुराको प्रसिद्ध धार्मिक तथा सांस्कृतिक पर्व ‘बडाल जाँत’ सुरु भएको छ। गन्यापधुरा गाउँपालिका–२ स्थित बडालमा बिहीबार राति रतेडी मेला सम्पन्न भएपछि आज मुख्य मेला अर्थात् दिउँसेडी सुरु भएको हो।
कात्तिक शुक्ल एकादशीको राति विशेष पूजाआजा गरी जाग्राम बस्ने परम्परा रहेको यस मेलामा कात्तिक शुक्ल द्वादशीका दिन बिहानदेखि लाटागन्याप देवताको दर्शन गर्ने गरिन्छ। यसरी दर्शन तथा पूजाआजा गरेमा मनोकामना पूरा हुने धार्मिक जनविश्वास रहिआएको छ।
धार्मिक तथा सांस्कृतिक महत्त्व बोकेको बडाल जाँतमा नाङ्गो तरबार नचाउँदै चौलो खेल्ने परम्परा विशेष आकर्षणका रूपमा रहेको छ। भागेश्वर देवतालाई गाँजले ढोग गरेपछि दिउँसोको मुख्य मेला शुभारम्भ हुने परम्परा छ।
प्राचीनकालदेखि चल्दै आएको यस जाँतमा छलिया नाच, देवीदेवताको दर्शन तथा आशीर्वाद लिने परम्परा पनि रहेको छ। मेलामा दाइना, दमाहा, रुईसिंग र भोकरलगायतका परम्परागत बाजागाजाको तालमा स्थानीयहरू हातमा तरबार लिएर चौलो खेल्दै गाँज नचाउने गर्छन्।
तरबारसहित खेलिने चौलो नाचका कारण बडाल जाँत सुदूरपश्चिमको मौलिक कला, संस्कृति र धार्मिक पहिचानका रूपमा स्थापित हुँदै आएको छ।










Discussion about this post