काठमाडौं । नेपाल प्रिमियर लिग (एनपीएल) को तेस्रो संस्करणअन्तर्गत लिग चरणका खेल सकिएसँगै प्लेअफमा पुग्ने चार टोलीको टुङ्गो लागेको छ। लुम्बिनी लायन्स, सुदूरपश्चिम रोयल्स, काठमाडौं गोर्खाज र चितवन राइनोजले प्लेअफमा स्थान बनाएका छन्।
लिग चरणको अन्तिम खेलमा पोखरा एभेन्जर्सले काठमाडौं गोर्खाजलाई ५५ रनले पराजित गरेपछि प्लेअफको समीकरण पूरा भएको हो।
अब क्वालिफायर–वानमा शीर्ष स्थानको लुम्बिनी लायन्स र दोस्रो स्थानको सुदूरपश्चिम रोयल्स भिड्नेछन्। त्यस्तै, इलिमिनेटरमा काठमाडौं गोर्खाजले चितवन राइनोजको सामना गर्नेछ।
क्वालिफायर–वानको विजेता सोझै फाइनलमा पुग्नेछ। पराजित टोलीले इलिमिनेटरको विजेतासँग क्वालिफायर–टु खेल्ने अवसर पाउनेछ। इलिमिनेटरमा पराजित हुने टोली भने प्रतियोगिताबाट बाहिरिनेछ।
लिग चरणमा साविक विजेता लुम्बिनीले ११ अङ्कसहित पहिलो स्थान हासिल गरेको छ भने साविक उपविजेता सुदूरपश्चिम १० अङ्कसहित दोस्रो बनेको छ।
अन्तिम खेलमा पोखराले दिएको २२५ रनको लक्ष्य पछ्याएको काठमाडौं १९ ओभर ५ बलमा १६९ रनमै समेटिएको थियो। त्यसअघि पोखराले निर्धारित २० ओभरमा तीन विकेट गुमाएर २२४ रन बनाएको थियो।
यसैगरी, लिग चरणको अन्तिम दिन भएको अर्को खेलमा कर्णाली याक्सले चितवन राइनोजलाई २४ रनले पराजित गर्दै प्रतियोगितामा सान्त्वना जित निकालेको छ।
अब चार टोलीबीच हुने प्लेअफका खेलबाट एनपीएलको तेस्रो संस्करणको उपाधि दाबेदार टुङ्गो लाग्नेछ।










Discussion about this post