काठमाण्डौ – भोटेकोशी–त्रिशूली विपद्पछिको पुनर्निर्माणका लागि सरकारले ४ देखि ५ अर्ब अमेरिकी डलर अर्थात् करिब ६ देखि साढे ७ खर्ब रुपैयाँ जुटाउने तयारी गरेको छ।
अर्थमन्त्री डा. स्वर्णिम वाग्लेले पुनर्निर्माणका लागि भारत, चीन, विश्व बैंक र एशियाली विकास बैंकसँग वित्तीय तथा कूटनीतिक संवाद अघि बढाइएको बताउनुभएको छ।
सिंहदरबारमा बसेको संसदीय विशेष समितिको बैठकमा उहाँले आवश्यक स्रोतको करिब ८० प्रतिशत यी चार निकायबाट जुटाउने अपेक्षा गरिएको जानकारी दिनुभयो। बाँकी रकम अन्य विकास साझेदार तथा दातृ निकायबाट जुटाउने सरकारको योजना छ।
अर्थमन्त्री वाग्लेले भारतसँग विशेष वित्तीय प्याकेजबारे छलफल भइरहेको र प्रधानमन्त्रीको आसन्न भारत भ्रमणका क्रममा केही सम्झौता हुन सक्ने बताउनुभयो।
त्यस्तै, चीनसँग पुनर्निर्माण, व्यापारिक नाका, रेलमार्ग, सुरुङमार्ग र आधुनिक भन्सार पूर्वाधार विकासबारे छलफल भइरहेको उहाँले जानकारी दिनुभयो।
अनुदान सहायता घट्दै गएको अवस्थामा सहुलियतपूर्ण ऋणसमेत विवेकपूर्ण ढङ्गले उपयोग गर्नुपर्नेमा उहाँले जोड दिनुभयो।
Discussion about this post