काठमाण्डौ – नेपाल प्रिमियर लिग (एनपीएल) क्रिकेटमा आज दुईवटा खेल हुँदैछन् । आजको पहिलो खेलमा कर्णाली याक्स र सुदूरपश्चिम रोयल्सबीच प्रतिस्पर्धा हुनेछ ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने खेल दिउँसो साढे १२ बजे शुरु हुनेछ । दुवै टोली जित निकाल्दै प्लेअफको सम्भावना बलियो बनाउने लक्ष्यसहित मैदान उत्रनेछन् ।
दुवै टोलीले समान चार अंक जोडेका छन् । तर रनरेटका आधारमा कर्णाली सुदूरपश्चिमभन्दा अगाडि छ । तीन खेल खेलेको कर्णालीले दुई जित र एक हारसहित अंक तालिकाको तेस्रो स्थान ओगटेको छ ।
यता चार खेल खेलेको सुदूरपश्चिमले पनि दुई जित र दुई हार व्यहोरेको छ । रनरेटमा पछि पर्दा टोली तालिकाको छैटौँ स्थानमा रहेको छ ।
आजै बेलुकी ५ बजे चितवन राइनोज र पोखरा एभेन्जर्सबीच दोस्रो खेल हुनेछ । तीन खेल खेलेको पोखराले अहिलेसम्म जित निकाल्न सकेको छैन । अंकविहीन पोखरा तालिकाको पुछारमा छ । पोखरा आज प्रतियोगितामा पहिलो जित निकाल्ने लक्ष्यमा हुनेछ ।
त्यस्तै, तीन अंकसहित तालिकाको सातौँ स्थानमा रहेको चितवन पनि दोस्रो जितको खोजीमा हुनेछ । चितवनले एक खेल जितेको छ भने एक खेलमा हार व्यहोरेको छ । टोलीको एक खेल वर्षाका कारण रद्द भएको थियो ।
यसअघि हिजो भएका खेलमा काठमाण्डौ गोर्खाजले विराटनगर किङ्ग्सलाई पराजित गरेको थियो भने लुम्बिनी लायन्सले जनकपुर बोल्ट्सलाई हराएको थियो ।
आजका दुवै खेलले अंक तालिकाको समीकरणमा महत्वपूर्ण प्रभाव पार्ने अपेक्षा गरिएको छ ।
Discussion about this post