काठमाडौं । चालु आर्थिक वर्ष २०८३/८४ को पहिलो त्रैमासमा नेपालका २० वाणिज्य बैंकले कुल १९ अर्ब ११ करोड रुपैयाँभन्दा बढी खुद नाफा आर्जन गरेका छन्।
बैंकहरूले सार्वजनिक गरेको वित्तीय विवरणअनुसार गत आर्थिक वर्षको सोही अवधिको तुलनामा यस वर्ष नाफा ४५.४६ प्रतिशतले बढेको हो। गत वर्ष पहिलो त्रैमासमा बैंकहरूको कुल नाफा १३ अर्ब १४ करोड रुपैयाँ रहेको थियो।
समीक्षा अवधिमा १० वटा बैंकले १ अर्ब रुपैयाँभन्दा बढी नाफा कमाएका छन्। सबैभन्दा बढी नाफा कमाउँदै नबिल बैंक पहिलो स्थानमा रहेको छ। बैंकले २ अर्ब ५५ करोड रुपैयाँ नाफा आर्जन गरेको छ। त्यस्तै, ग्लोबल आईएमई बैंकले २ अर्ब ३१ करोड र राष्ट्रिय वाणिज्य बैंकले १ अर्ब ६४ करोड रुपैयाँ नाफा कमाएका छन्।
यसैगरी एभरेस्ट, प्राइम कमर्सियल, नेपाल इन्भेस्टमेन्ट मेगा, एनएमबी, कृषि विकास, कुमारी र सानिमा बैंकले पनि १ अर्ब रुपैयाँभन्दा बढी नाफा आर्जन गरेका छन्।
गत वर्ष पहिलो त्रैमासमा २२ करोड रुपैयाँ घाटामा रहेको सिटिजन्स बैंक यस वर्ष १० करोड रुपैयाँ नाफामा फर्किएको छ। यस्तै, लक्ष्मी सनराइज, प्रभु र सिद्धार्थ बैंकको नाफा पनि दोब्बरभन्दा बढीले वृद्धि भएको छ।
Discussion about this post