पोखरा, असोज ३१ । गण्डकी प्रदेशका प्रमुख डिल्लीराज भट्टले बडादशैं तथा विजयादशमी २०८३ को अवसरमा शुभकामना व्यक्त गर्नुभएको छ।
शुभकामना सन्देश जारी गर्दै प्रदेश प्रमुख भट्टले बडादशैंले नेपालीबीच आपसी प्रेम, देशभक्ति, करुणा र अहिंसाको भावना अभिवृद्धि गर्ने विश्वास व्यक्त गर्नुभएको छ।
उहाँले बडादशैंजस्ता चाडपर्वको संरक्षण र संवर्द्धनले राष्ट्र तथा राष्ट्रियताप्रति सम्मान र प्रेमको भावना जागृत गर्न सहयोग पुग्ने बताउनुभएको छ।
प्रदेश प्रमुख भट्टले बडादशैंले राष्ट्र पुनर्निर्माणमा नयाँ जोश, जाँगर र उत्साह प्रदान गर्दै सामाजिक तथा सांस्कृतिक एकता कायम राख्न प्रेरणा दिने विश्वास व्यक्त गर्नुभएको छ। साथै, दिगो शान्ति, नागरिक सुरक्षा, अमनचयन, सुशासन, विकास र समृद्धिको आकाङ्क्षा पूरा गर्न ऊर्जा मिल्ने उहाँको अपेक्षा छ।
नेपालको बहुजातीय, बहुभाषिक, बहुधार्मिक र बहुसांस्कृतिक विशेषतालाई आत्मसात् गर्दै विविधताबीचको एकता कायम राख्न बडादशैंको विशेष महत्त्व रहेको उहाँले उल्लेख गर्नुभएको छ।
उहाँले सामाजिक तथा सांस्कृतिक परम्परा, ऐक्यबद्धता, सहिष्णुता र सद्भावको संरक्षण एवं प्रवर्द्धनमा सबैलाई प्रेरणा मिल्ने विश्वाससमेत व्यक्त गर्नुभएको छ।
Discussion about this post