काठमाडौं। राष्ट्रिय स्वतन्त्र पार्टी (रास्वपा) का सांसद खगेन्द्र सुनारमाथि लागेको आरोपबारे पार्टीले आन्तरिक छानबिन प्रक्रिया अघि बढाएको छ। छानबिनलाई प्रभावकारी बनाउन केन्द्रीय अनुशासन आयोगले बिहीबार छुट्टै ६ सदस्यीय समिति गठन गरेको हो।
महिलाको मर्यादामा आँच पुर्याउने शब्द प्रयोग गरिएको र रकम नदिए ज्यान मार्ने धम्की दिइएको भनिएको अडियो सार्वजनिक भएपछि रास्वपाले अनुशासन आयोगलाई छानबिन गर्न निर्देशन दिएको थियो।
अनुशासन आयोगका उपप्रमुख तथा अधिवक्ता हरिचन्द्र भट्टराईको संयोजकत्वमा गठित समितिमा रामचन्द्र कार्की, सुशीला सिम्खडा, उपेन्द्रनन्दन तिमिल्सिना, सन्तोष आचार्य र सन्तोष विशुंके सदस्य छन्।
समितिको बिहीबार बसेको पहिलो बैठकले घटनासँग सम्बन्धित सामग्री संकलन गर्न सरोकारवाला निकायलाई पत्राचार गर्ने निर्णय गरेको संयोजक भट्टराईले जानकारी दिए। उनका अनुसार सांसद सुनारको लिखित स्पष्टीकरण प्राप्त भइसकेको छ भने सार्वजनिक भएको अडियो तथा अन्य सामग्रीको प्रारम्भिक अध्ययन सुरु गरिएको छ।
समितिले आवश्यक प्रमाण संकलन तथा अध्ययनपछि अनुशासन आयोगलाई प्रतिवेदन बुझाउनेछ। आयोगमा प्रतिवेदनमाथि थप छलफल हुने भट्टराईले बताए।
सुनारले आरोप अस्वीकार गर्दै दिए लिखित जवाफ
रास्वपाका केन्द्रीय सदस्यसमेत रहेका सांसद सुनारले बिहीबार अनुशासन आयोगसमक्ष लिखित स्पष्टीकरण पेस गरेका छन्। उनले सार्वजनिक भएका आरोपहरू असत्य रहेको र अडियो कृत्रिम बुद्धिमत्ता (एआई) लगायत प्रविधिको प्रयोग गरी तयार पारिएको दाबी गर्दै आएका छन्।
पार्टीले छानबिन प्रक्रिया जारी रहँदासम्म सुनारलाई कुनै पनि सार्वजनिक कार्यक्रममा सहभागी नहुन निर्देशन दिएको छ। सुनार बाँके निर्वाचन क्षेत्र नम्बर ३ बाट निर्वाचित सांसद हुन्।
अडियो सार्वजनिक गर्ने सञ्चारमाध्यमसँग पनि जानकारी माग
सुनारको भनिएको अडियो जनआस्था साप्ताहिकले सोमबार सार्वजनिक गरेको थियो। छानबिन समितिले अडियो तथा समाचार प्रकाशन र प्रसारणसँग सम्बन्धित सामग्री प्राप्त गर्न जनआस्था साप्ताहिकलगायत सम्बन्धित निकायमा पत्राचार गरेको संयोजक भट्टराईले बताए।
उनका अनुसार आवश्यक परे अडियोमा आवाज सुनिएको भनिएकी महिलासँग पनि थप जानकारी लिइनेछ। समितिले संकलित सामग्री र प्रमाणका आधारमा घटनाबारे थप छानबिन गर्ने जनाएको छ।
छानबिनको अन्तिम निष्कर्ष भने समितिको प्रतिवेदन र अनुशासन आयोगको छलफलपछि मात्र स्पष्ट हुनेछ।
Discussion about this post