एजेन्सी । ग्रिनल्यान्ड सरकारले अमेरिकी राष्ट्रपति डोनाल्ड ट्रम्पले आफ्नो क्षेत्रमा ठूलो मात्रामा तेल, ग्यास र खनिज उत्खननको तयारी भइरहेको भनी गरेको दाबी अस्वीकार गरेको छ।
ग्रिनल्यान्डका उपखानीमन्त्री जोर्गेन ह्यामेकेन–होल्मका अनुसार अमेरिकी कम्पनीहरूबाट केही सीमित प्राविधिक तथा अध्ययनसम्बन्धी काम भइरहे पनि ठूलो मात्रामा व्यावसायिक उत्खनन सुरु हुने अवस्था छैन। यसका लागि अझै वर्षौँ लाग्न सक्ने उनले बताएका छन्।
अनुसन्धानकर्ताहरूका अनुसार ग्रिनल्यान्डको कठोर भौगोलिक अवस्था, बाक्लो बरफ र पूर्वाधारको अभावका कारण प्राकृतिक स्रोत उत्खनन कठिन र खर्चिलो छ।
डेनमार्कको परराष्ट्र मन्त्रालयले पनि अमेरिकी लगानीकर्ताले ग्रिनल्यान्डको स्थानीय कानुनअनुसार नै काम गर्नुपर्ने स्पष्ट पारेको छ। हालै अमेरिका, डेनमार्क र ग्रिनल्यान्डबीच भएको सम्झौताले अमेरिकी लगानीकर्तालाई प्राकृतिक स्रोत उत्खननमा अन्य देशका लगानीकर्ताभन्दा विशेष सुविधा नदिने मन्त्रालयको भनाइ छ।
राष्ट्रपति ट्रम्पले ग्रिनल्यान्डलाई अमेरिकी राष्ट्रिय सुरक्षाका लागि महत्त्वपूर्ण क्षेत्र बताउँदै आएका छन्। उनले त्यहाँका प्राकृतिक स्रोत र रणनीतिक अवस्थालाई अमेरिकाको हितमा उपयोग गर्ने संकेत दिएका छन्। तर ग्रिनल्यान्डको स्रोत उत्खनन र त्यसमा अमेरिकी पहुँचको विषयले अमेरिका, डेनमार्क र युरोपेली साझेदारबीच तनाव बढाएको छ।
Discussion about this post