पोखरा — बाढीपहिरोका कारण केही पदमार्ग प्रभावित भए पनि अन्नपूर्ण संरक्षण क्षेत्रमा विदेशी पर्यटकको आगमन बढेको छ। गत सेप्टेम्बर महिनामा मात्रै यस क्षेत्रमा २१ हजारभन्दा बढी पर्यटकले प्रवेश गरेका छन्।
अन्नपूर्ण संरक्षण क्षेत्र आयोजना (एक्याप) का अनुसार सेप्टेम्बरमा करिब २१ हजार पर्यटक आएका थिए। तीमध्ये करिब १० हजार ७ सय तेस्रो मुलुकका र १० हजार ३ सय सार्क क्षेत्रका पर्यटक थिए। यो संख्या गत वर्षको सोही अवधिको तुलनामा बढी रहेको संरक्षण अधिकृत राजन पौडेलले बताएका छन्।
अन्नपूर्ण आधार शिविर र मर्दी हिमाल पदमार्गमा पर्यटकको चहलपहल राम्रो रहेको छ। केही क्षेत्रमा पर्यटकको चाप बढ्दा बास बस्नका लागि कोठा पाउनसमेत कठिन हुने गरेको छ।
यसैबीच, पोखरामा फ्लाइ दुबईले नियमित अन्तर्राष्ट्रिय उडान सुरु गरेपछि पर्यटन व्यवसायीमा उत्साह थपिएको छ। असोज ७ गतेदेखि सुरु भएको उडानबाट अहिलेसम्म ३ हजार ११३ जनाले यात्रा गरेका छन्, जसमध्ये २ सयभन्दा बढी विदेशी पर्यटक रहेको नागरिक उड्डयन प्राधिकरणले जनाएको छ।
फ्लाइ दुबईले आगामी वर्षको अक्टोबरसम्मका लागि टिकट बुकिङ खुला गरिसकेको छ। यसले पोखरामा अन्तर्राष्ट्रिय उडान निरन्तर हुने र विदेशी पर्यटक आगमन बढ्ने आशा पर्यटन व्यवसायीमा जगाएको छ।
यद्यपि, बाढीपहिरोका कारण केही पदमार्गमा समस्या देखिँदा ट्रेकिङ तथा ट्राभल व्यवसाय प्रभावित भएको पर्यटन व्यवसायीले बताएका छन्। मनास्लु क्षेत्रको यात्रा प्रभावित भएपछि केही पर्यटकले वैकल्पिक गन्तव्यका रूपमा अन्नपूर्ण क्षेत्र रोज्न सक्ने अनुमान गरिएको छ।
Discussion about this post