पशुपतिनाथको सुरक्षा र प्रवेश व्यवस्थामा कडाइ गर्न विश्व हिन्दु परिषद्को माग

काठमाडौं — विश्व हिन्दु परिषद् नेपालले पशुपतिनाथ मन्दिरको धार्मिक परम्परा र मर्यादा कायम राख्न प्रवेश व्यवस्था, सुरक्षा तथा अनुगमन प्रणाली थप प्रभावकारी बनाउन माग गरेको छ।

परिषद्को मठ–मन्दिर तथा पुरोहित विभागले जारी गरेको विज्ञप्तिमा परम्परागत नियमअनुसार मूल मन्दिर तथा गर्भगृहमा हिन्दुबाहेक अन्य धर्मावलम्बीको प्रवेश निषेध रहेको उल्लेख गरिएको छ। परिषद्ले यो व्यवस्था धार्मिक आस्था, मन्दिरको पवित्रता र परम्परागत पूजा पद्धतिको संरक्षणसँग सम्बन्धित रहेको जनाएको छ।

हालै सामाजिक सञ्जाल टिकटकमा पशुपतिनाथको संवेदनशील क्षेत्रको भिडियो सार्वजनिक भएपछि परिषद्ले मन्दिरको सुरक्षा तथा निगरानी व्यवस्थामाथि प्रश्न उठाएको छ।

धार्मिक स्वतन्त्रताको सम्मान गर्दै पशुपति क्षेत्रका स्थापित नियम र मर्यादाको पालना सुनिश्चित गर्नुपर्ने परिषद्को भनाइ छ।

पशुपति क्षेत्र विकास कोषको अनुगमन प्रणालीमा कमजोरी देखिएको भन्दै परिषद्ले यस्ता घटना दोहोरिन नदिन निगरानी बढाउन र नियम उल्लङ्घन गर्नेमाथि प्रचलित कानुनअनुसार कारबाही गर्न आग्रह गरेको छ।