काठमाडौं । काठमाडौं उपत्यकाको विद्युत् आपूर्ति प्रणालीलाई थप भरपर्दो र गुणस्तरीय बनाउन महत्वपूर्ण मानिएको मातातीर्थ–चोभार १३२ केभी प्रसारण लाइनको निर्माण सम्पन्न भएको छ।
मातातीर्थ सबस्टेसनदेखि चोभार सबस्टेसनसम्मको करिब ६ किलोमिटर लामो प्रसारण लाइन शुक्रबारदेखि चार्ज गरिने भएको छ। लाइन सञ्चालनमा आएपछि यो राष्ट्रिय प्रसारण प्रणालीमा जोडिएर नियमित विद्युत् प्रवाह हुनेछ।
नेपाल विद्युत् प्राधिकरणका कार्यकारी निर्देशक दीर्घायुकुमार श्रेष्ठले मातातीर्थ–चोभार प्रसारण लाइन र चोभार सबस्टेसन सञ्चालनमा आएपछि काठमाडौं उपत्यका तथा आसपासका क्षेत्रमा विद्युत् माग र आपूर्तिबीच सन्तुलन कायम गर्न सहज हुने बताउनुभएको छ।
चोभार सबस्टेसनबाट पाटनसम्म करिब साढे ४ किलोमिटर १३२ केभी भूमिगत प्रसारण लाइन निर्माणलाई पनि उच्च प्राथमिकताका साथ अघि बढाइएको प्राधिकरणले जनाएको छ।
चोभार सबस्टेसनमा स्थानीय विद्युत् आपूर्तिका लागि ११ केभीका नौ वटा फिडर निर्माण गरिएको छ। यसबाट कीर्तिपुर, फर्पिङ, पुल्चोक, एकान्तकुनालगायतका क्षेत्रमा विद्युत् आपूर्ति गरिनेछ। सबस्टेसन सञ्चालनपछि ती क्षेत्रमा भोल्टेज सुधार हुनुका साथै विद्युत् आपूर्ति थप भरपर्दो हुने अपेक्षा गरिएको छ।
मातातीर्थ–चोभार प्रसारण लाइन सञ्चालनमा आएपछि काठमाडौं उपत्यकामा विद्युत् आपूर्तिका लागि थप वैकल्पिक मार्ग उपलब्ध हुनेछ। यसले बढ्दो विद्युत् माग व्यवस्थापनमा समेत सहयोग पुग्ने प्राधिकरणको विश्वास छ।
उपत्यकाको विद्युत् प्रणालीलाई थप सुदृढ बनाउन थानकोट–चापागाउँ–भक्तपुर १३२ केभी प्रसारण लाइन आयोजना अघि बढाइएको थियो। आयोजनाअन्तर्गत काठमाडौं र भक्तपुरतर्फका अधिकांश प्रसारण संरचना निर्माण सम्पन्न भइसकेका छन्।
Discussion about this post