काठमाण्डौ — राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख डा. धर्मराज उप्रेतीले हिमाली क्षेत्रमा देखिन थालेका असामान्य तथा विनाशकारी विपद्का लागि परम्परागत पूर्वसूचना प्रणाली पर्याप्त नहुने बताएका छन्।
काठमाण्डौमा आयोजित ‘परिवर्तनशील हिमालयमा जल सुरक्षा’ विषयक उच्चस्तरीय संवादमा उनले बाढी नदीमै सीमित रहने र बस्तीमा नपुग्ने भन्ने पुरानो बुझाइका कारण मानवीय क्षति हुने गरेको बताए।
भदौ १० गते भोटेकोशी–त्रिशूली करिडोरमा आएको बाढीले ठूलो मानवीय तथा भौतिक क्षति गरेको स्मरण गर्दै उनले यस्ता विपद्लाई ‘हिमाली सुनामी’ को संज्ञा दिए।
पूर्वसूचना प्रणालीले खतरा आउँदैछ भन्ने जानकारी मात्र नभई त्यसको गम्भीरता समेत स्पष्ट पार्नुपर्ने उनको भनाइ छ। यसबाट सर्वसाधारणलाई समयमै सुरक्षित स्थानमा पुग्न र सम्बन्धित निकायलाई तत्काल उद्धार तथा राहतमा परिचालन गर्न सहज हुने उनले बताए।
कार्यक्रममा अन्तर्राष्ट्रिय जल व्यवस्थापन संस्थाका महानिर्देशक डा. मार्क स्मिथले पानी खाद्य, ऊर्जा, जनस्वास्थ्य र आर्थिक विकाससँग प्रत्यक्ष जोडिएकाले एकीकृत तथा वैज्ञानिक पानी व्यवस्थापन आवश्यक रहेको बताए।
नेपालका लागि संयुक्त अरब इमिरेट्सका राजदूत अब्दुल्ला सइद मुबारक जर्वान अल शम्सीले हिमनदी पग्लने, अनियमित मनसुन र हिमनदी विस्फोटका जोखिम नेपालका लागि भविष्यको मात्र नभई वर्तमान चुनौती बनिसकेको बताए।
Discussion about this post