कञ्चनपुर । दोधारा चाँदनीलाई बाँकी नेपालसँग जोड्ने महाकाली नदीमाथिको ऐतिहासिक झोलुङ्गे पुल चुँडिएको छ । बुधबार बिहान पुलको पश्चिमतर्फको तेस्रो पिल्लर महाकाली नदीमा खसेपछि पुलको संरचना बीच भागमै टुटेको हो । बुधबार बिहानै पुल बांगिएको अवस्थामा देखिएपछि केही समयमै पिल्लर नदीमा खसेको थियो । पिल्लर खसेसँगै पुलको एक भाग नदीमा लत्रिएको छ । पुल चुँडिएपछि पैदलयात्री र दुई पाङ्ग्रे सवारीसाधनको आवागमन पूर्ण रूपमा रोकिएको छ ।
भीमदत्त नगरपालिका र दोधारा चाँदनी नगरपालिका जोड्ने यो पुल स्थानीयका लागि लामो समयदेखि महत्वपूर्ण आवागमनको माध्यम रहँदै आएको थियो । पुलबाट दैनिक आवतजावत गर्ने स्थानीयका लागि यसको क्षतिले समस्या सिर्जना भएको छ । पुल चुँडिनुको वास्तविक कारण भने प्राविधिक अध्ययनपछि मात्रै यकिन हुने कञ्चनपुरका प्रमुख जिल्ला अधिकारी मदन कोइरालाले बताउनुभयो। उहाँले क्षतिग्रस्त संरचना अहिले पनि नदीमै लत्रिएको अवस्थामा रहेकाले थप जोखिम हुन सक्ने भन्दै पुल क्षेत्रमा आवागमन रोकिएको बताउनुभएको छ। पुलमा प्रयोग भएको संरचनामार्फत दोधारा चाँदनी क्षेत्रमा इन्टरनेट सेवा समेत विस्तार गरिएको थियो । पुलको संरचनामा क्षति पुगेपछि दोधारा चाँदनी क्षेत्रमा इन्टरनेट सेवामा समेत प्रभाव परेको स्थानीयले बताएका छन् । पुल चुँडिएपछि पैदल तथा दुई पाङ्ग्रे सवारीसाधनको आवागमन प्रभावित भए पनि करिब एक किलोमिटर उत्तरतर्फ रहेको चार लेनको पक्की मोटरेबल पुल भने सञ्चालनमै छ । त्यसैले मुख्य सवारी आवागमनमा ठूलो असर परेको छैन ।
तर, पैदलयात्री र दुई पाङ्ग्रे सवारीसाधनका लागि झोलुङ्गे पुल महत्वपूर्ण माध्यम थियो । विसं २०५८ सालतिर निर्माण भएको करिब डेढ किलोमिटर लामो यो पुल केही वर्षअघिसम्म एसियाकै दोस्रो लामो झोलुङ्गे पुलका रूपमा समेत परिचित थियो । अढाई दशकभन्दा लामो समयदेखि दोधारा चाँदनीको आवागमन, पहिचान र पर्यटनसँग जोडिएको पुल चुँडिएपछि यसको मर्मत तथा पुनःसञ्चालनबारे चासो बढेको छ । महाकाली नदीमाथिको यो पुल दोधारा चाँदनीका लागि आवागमनको संरचना मात्रै नभई यहाँको इतिहास र पहिचानसँग जोडिएको महत्वपूर्ण सम्पदा पनि हो । पुलको संरचना क्षतिग्रस्त भएपछि तत्काल प्राविधिक परीक्षण गरी क्षतिको कारण पहिचान गर्नुपर्ने देखिएको छ । त्यसपछि आवश्यक मर्मत वा पुनर्निर्माणको प्रक्रिया अघि बढाउनुपर्ने स्थानीयको माग छ ।
Discussion about this post