कञ्चनपुर । महाकाली नदीमा पानीको बहाव घटेर एक लाख क्युसेकभन्दा तल झरेपछि बनबासा पुलबाट चारपाङ्ग्रे मालवाहक तथा यात्रुवाहक सवारीसाधनको आवागमन पुनः सञ्चालनमा आएको छ ।
जिल्ला आपत्कालीन कार्य सञ्चालन केन्द्र कञ्चनपुरका अनुसार भारतको बनबासास्थित शारदा ब्यारेजमा सोमबार बिहान ११ बजे महाकाली नदीको बहाव ९८ हजार २ सय ७२ क्युसेक मापन गरिएको थियो ।
शनिबार साँझ एक लाख क्युसेक नाघेको नदीको बहाव आइतबार दिउँसो २ बजे १ लाख ७७ हजार ९ सय २ क्युसेकसम्म पुगेको थियो । बहाव क्रमशः घट्दै सोमबार बिहान एक लाख क्युसेकभन्दा तल झरेपछि बनबासा पुलबाट चारपाङ्ग्रे सवारीसाधनको आवागमन खुलाइएको हो ।
महाकालीमा पानीको बहाव एक लाख क्युसेक नाघेपछि सुरक्षाका लागि यसअघि चारपाङ्ग्रे मालवाहक तथा यात्रुवाहक सवारीसाधनको आवागमन रोकिएको थियो । बहाव दुई लाख क्युसेक नाघेमा दुईपाङ्ग्रे सवारीसाधन र पैदल यात्रासमेत रोक्ने गरिएको कञ्चनपुरका प्रमुख जिल्ला अधिकारी मदन कोइरालाले बताउनुभयो ।
नदीको जलस्तर घटे पनि महाकालीसहित अन्य खोलानालाको पानीको सतह अझै सामान्य अवस्थामा नफर्किएकाले जोखिम कायमै रहेको प्रशासनले जनाएको छ । प्रशासनले तटीय तथा डुबानको जोखिममा रहेका क्षेत्रका बासिन्दालाई सतर्क रहन, नदी तथा खोलानालामा नजान र जोखिमयुक्त गतिविधि नगर्न आग्रह गरेको छ ।
Discussion about this post