कञ्चनपुर । प्रगतिशील लेखक सङ्घ (प्रलेस), नेपाल जिल्ला समिति कञ्चनपुरले सङ्घको ७५औँ स्थापना दिवस अर्थात् हिरक जयन्तीको पूर्वसन्ध्यामा रचना वाचन कार्यक्रम आयोजना गरेको छ ।
प्रलेस कञ्चनपुरका अध्यक्ष प्रजापति नेगीको अध्यक्षतामा सम्पन्न कार्यक्रममा प्रलेसका केन्द्रीय सदस्य तथा सुदूरपश्चिम प्रदेश सहइन्चार्ज रमेश पन्त ‘मीतबन्धु’ प्रमुख अतिथिका रूपमा सहभागी हुनुहुन्थ्यो । कार्यक्रममा प्रलेस कञ्चनपुरका पूर्वअध्यक्ष तथा गुगुल्डी वाङ्मय प्रतिष्ठानका अध्यक्ष वीरबहादुर चन्द ‘विश्राम’ र पूर्वसल्लाहकार तथा संस्कृतिविद् पञ्चमराज भट्ट विशिष्ट अतिथिका रूपमा सहभागी हुनुहुन्थ्यो ।
महेन्द्रनगरस्थित ककालु फुड्समा आयोजित कार्यक्रममा साहित्यकार वीरबहादुर चन्द, पञ्चमराज भट्ट, अमितप्रसाद भट्ट, देवदत्त ओझा, सन्दीप ओझा ‘समर्पण’, गङ्गा बिष्ट नेगी, चाँदनी भट्ट, निर्मला साउद, प्रेमप्रकाश कलौनीलगायत एक दर्जनभन्दा बढी साहित्यकारले गीत, गजल, कविता तथा मुक्तकलगायतका रचना प्रस्तुत गरेका थिए ।
कार्यक्रममा प्रमुख अतिथि मीतबन्धुले प्रलेसले स्थापना कालदेखि नै राष्ट्र, राष्ट्रियता तथा जनजीविकाका सवालमा आवाज उठाउँदै आएको बताउनुभयो । उहाँले प्रगतिशील साहित्यकार तथा कलाकारले समाजमा रहेका विकृति र विसङ्गतिविरुद्ध सिर्जनामार्फत आवाज उठाउनुपर्नेमा जोड दिनुभयो ।
कार्यक्रममा प्रलेसका संस्थापक साहित्यकार श्यामप्रसादसहित दिवङ्गत स्रष्टाहरूप्रति श्रद्धाञ्जली अर्पण गर्दै साहित्य र समाजमा उनीहरूले पुर्याएको योगदानको स्मरण गरिएको थियो । हिरक जयन्तीको अवसरमा अग्रज स्रष्टा वीरबहादुर चन्द ‘विश्राम’ र संस्कृतिविद् पञ्चमराज भट्टलाई प्रलेस कञ्चनपुरका तर्फबाट सम्मानसमेत गरिएको थियो ।
यसैबीच, कार्यक्रममा प्रलेस कञ्चनपुरका पूर्वअध्यक्ष वीरबहादुर चन्द ‘विश्राम’ले रसुवाको भोटेकोशी बाढीपीडितका लागि २० हजार १ सय १० रुपैयाँ सहयोग रकम प्रलेस कञ्चनपुरका अध्यक्ष प्रजापति नेगीलाई हस्तान्तरण गर्नुभयो ।
उक्त रकममा प्रलेस कञ्चनपुरका तर्फबाट थप सहयोग गरी असोज ५ गते प्रलेसको स्थापना दिवसका अवसरमा प्रधानमन्त्री दैवी प्रकोप उद्धार कोषमा जम्मा गरिने अध्यक्ष नेगीले जानकारी दिनुभयो ।
Discussion about this post