भक्तपुर । गृहमन्त्री सुधन गुरुङले भक्तपुरको दमकल सेवा प्रभावकारी बनाउन आवश्यक स्रोतसाधन र प्रविधिमा ध्यान दिने बताएका छन्।
मङ्गलबार दूधपाटीस्थित जुद्ध बारुण यन्त्र भक्तपुर कार्यालयको स्थलगत अवलोकन गर्दै गृहमन्त्री गुरुङले दमकलको अवस्था र अग्नि नियन्त्रणका लागि आवश्यक उपकरणबारे जानकारी लिएका हुन्। कार्यालय प्रमुख विजय धौभडेलले दमकलको अवस्था, जनशक्ति तथा प्रविधिसम्बन्धी आवश्यकताबारे जानकारी गराएका थिए।
गृहमन्त्री गुरुङले आगलागी नियन्त्रणमा ड्रोन प्रविधिको प्रयोगबारे पनि सरकारले ध्यान दिने बताए। कार्यालयका प्रमुख धौभडेलले अग्ला भवनमा हुने आगलागी नियन्त्रणका लागि दुईवटा ड्रोन आवश्यक रहेको बताए। चालु आर्थिक वर्षमा प्रविधि तथा उपकरण खरिदका लागि रु ९४ लाख बजेट विनियोजन गरिएको छ।
धौभडेलले पुराना दमकलको संग्रहालय निर्माण तथा कर्मचारीको समस्या समाधानमा समेत ध्यान दिन आग्रह गरे।
यसै क्रममा गृहमन्त्री गुरुङले नवदुर्गा मन्दिर, कमलविनायक बजार र कमलपोखरीको समेत अवलोकन गरेका थिए। नवदुर्गा मन्दिरमा उनले दसैँको नवमीका दिन दिइने बलिसम्बन्धी परम्पराबारे जानकारी लिएका थिए। नवदुर्गा देवगणका तर्फबाट नारायण वनमालाले नवदुर्गा जात्रा तथा पर्व सञ्चालनमा सरकारको सहयोग आवश्यक रहेको बताए।
Discussion about this post