काठमाडौं । नेपाली कांग्रेसको १५औँ महाधिवेशनको कार्यतालिकालाई लिएर पार्टीभित्रको विवाद थप चर्किएको छ। सभापति गगन थापा र पूर्वसभापति शेरबहादुर देउवाले मंगलबार छुट्टाछुट्टै वक्तव्य जारी गर्दै फरक–फरक धारणा सार्वजनिक गरेका छन्।
सभापति थापाले असोज ३ र ४ गते हुने वडा अधिवेशनमा कुनै अलमलमा नपरी सक्रियतापूर्वक सहभागी हुन क्रियाशील सदस्य, समर्थक तथा शुभेच्छुकलाई आग्रह गरेका छन्। थापाका अनुसार विशेष महाधिवेशनअघि कायम रहेको केन्द्रीय कार्यसमितिका पदाधिकारी तथा सदस्यलाई वर्तमान केन्द्रीय कार्यसमितिमा समावेश गर्ने निर्णय भइसकेको छ।
थापाले पार्टीभित्र फरक मत र असमझदारी हुन सक्ने भए पनि संवाद, विधि र पद्धतिमार्फत समाधान खोज्नुपर्ने बताएका छन्। उनका अनुसार असोज ३ गतेदेखि वडा अधिवेशन सुरु गरी असोज १६ देखि १९ गतेसम्म काठमाडौंमा १५औँ महाधिवेशन गर्ने कार्यतालिका अघि बढाइएको छ।
यता पूर्वसभापति देउवाले असोज ३ गतेदेखि सुरु हुने महाधिवेशन प्रक्रियामा सहभागी नहुन नेता तथा कार्यकर्तालाई आग्रह गरेका छन्। उनले विशेष महाधिवेशनको वैधतासम्बन्धी विषय सर्वोच्च अदालतमा विचाराधीन रहेकाले अन्तिम निरूपणअघि महाधिवेशन प्रक्रिया अघि बढाउनु उचित नहुने दाबी गरेका छन्।
देउवा पक्षले मंसिर २१ देखि २३ गतेसम्म काठमाडौंमा १५औँ महाधिवेशन गर्ने छुट्टै कार्यतालिका अघि सारेको छ। उक्त प्रक्रियाअन्तर्गत असोज १५ गतेदेखि वडा अधिवेशन सुरु गर्ने तयारी गरिएको छ।
यसैबीच कांग्रेसको निर्वाचन निर्देशिकामा विभिन्न तहका पदमा उम्मेदवारी, प्रतिनिधि छनोट, मतदान, मतगणना तथा समावेशी प्रतिनिधित्वसम्बन्धी व्यवस्था गरिएको छ। केन्द्रीय निर्वाचन समितिले १५औँ महाधिवेशनका लागि निर्वाचन कार्यतालिका समेत सार्वजनिक गरिसकेको छ।
Discussion about this post