नेपाली कम्युनिष्ट पार्टीका सांसद गोपाल शर्माले प्रधानमन्त्री बालेन्द्र शाहलाई ‘गुप्तवास’ शैली त्यागेर संसद्मा उपस्थित भई जनप्रतिनिधिको सामना गर्न आग्रह गरेका छन्।
मंगलबार बसेको प्रतिनिधिसभाको बैठकमा विशेष समय लिएर बोल्दै सांसद शर्माले प्रधानमन्त्री संसद् र आफूलाई समर्थन गर्ने राजनीतिक दलहरूबाट टाढिँदै गएको आरोप लगाए। उनले प्रधानमन्त्री संसद्मा उपस्थित भएर सांसदहरूसँग निरन्तर संवाद र सहकार्य गर्नुपर्नेमा जोड दिए।
प्रधानमन्त्री संसद्मा उपस्थित हुँदा सरकार थप सुरक्षित र सुदृढ हुने बताउँदै शर्माले उनलाई प्रधानमन्त्री बनाउन सहयोग गर्ने दल तथा विश्वासको मत दिने संसद्बाट टाढिएर सरकार सञ्चालन गर्न नसकिने टिप्पणी गरे।
‘प्रधानमन्त्रीज्यूलाई मेरो आग्रह छ, गुप्तवासमा नबस्नुहोस्। तपाईं एक्लै हुँदा एक्लै हुनुहुन्छ, तर संसद्मा आउँदा सांसद र सिंगो संसद् तपाईंको साथमा हुन्छ,’ उनले भने, ‘तपाईंले सकारात्मक पहल गर्नुभयो भने संसद्ले साथ दिन्छ, तर गलत प्रक्रिया अपनाउनुभयो भने संसद् नै तपाईंको विपक्षमा उभिन्छ।’
सांसद शर्माले प्रधानमन्त्रीले आफूलाई निर्वाचित गराउन सहयोग गर्ने राजनीतिक दलका कार्यालयमा समेत जान छोडेको भन्दै आलोचना गरे। संसद् र राजनीतिक दलबाट प्रधानमन्त्री टाढिँदै गएकै कारण सामाजिक सञ्जालमा समेत एक्लोपन झल्किने खालका अभिव्यक्ति सार्वजनिक हुने गरेको उनको टिप्पणी थियो।
उनले प्रधानमन्त्रीलाई संसद्सँग निरन्तर संवाद र सहकार्य गर्न आग्रह गर्दै भने, ‘जसले तपाईंलाई प्रधानमन्त्री बनायो, त्यो दल र जसले तपाईंलाई विश्वासको मत दियो, त्यो संसद्बाट टाढा भएर सरकार चलाउन सकिँदैन। त्यसैले संसद्सँग निरन्तर संवाद र सहकार्य गर्न म प्रधानमन्त्रीज्यूलाई आग्रह गर्दछु।’
सांसद शर्माले प्रधानमन्त्री शाहका पछिल्ला केही अभिव्यक्ति विवादास्पद बनेको उल्लेख गर्दै ती अभिव्यक्ति सच्याउन सभामुख डोलप्रसाद अर्यालको ध्यानाकर्षण गराए।
उनले प्रधानमन्त्रीलाई आफ्ना गलत अभिव्यक्ति सच्याउन रुलिङ गर्न तथा विवादित भनाइहरू संसद्को अभिलेखबाट हटाउनसमेत सभामुखसँग माग गरेका छन्।
Discussion about this post