स्वास्थ्य तथा खाद्य स्वच्छतामन्त्री निशा मेहताले धनुषाको ढल्केबरमा प्रस्तावित ट्रमा सेन्टर अन्यत्र सार्न नखोजिएको स्पष्ट पारेकी छन्।
सोमबार प्रतिनिधिसभाको बैठकमा उठेका प्रश्नको जवाफ दिँदै उनले ढल्केबरमा तत्काल ट्रमा सेन्टर सञ्चालनका लागि आवश्यक पूर्वाधार नरहेकाले लहानस्थित प्रादेशिक अस्पतालमा तत्काल ट्रमा सेवा सुरु गर्न लागिएको बताइन्।
लहान अस्पतालमा सिटी स्क्यान, आवश्यक चिकित्सकीय जनशक्ति, बिरामीको पर्याप्त चाप र ब्लड बैंक भएकाले तत्काल ट्रमा युनिट सञ्चालन गर्न सकिने उनको भनाइ छ।
मन्त्री मेहताले सडक दुर्घटनामा गम्भीर घाइतेलाई उपचारका लागि काठमाडौं ल्याउनुपर्ने बाध्यता अन्त्य गर्न प्रत्येक प्रदेशमा कम्तीमा एक ट्रमा सेन्टर विस्तार गर्ने सरकारको नीति रहेको बताइन्। ढल्केबरमा दीर्घकालीन ट्रमा सेन्टर निर्माणको योजना भने यथावत् रहेको उनले स्पष्ट पारिन्।
Discussion about this post