गगन थापाको आरोप : ‘सरकार बरालिँदै हिँडेको छ’

नेपाली काँग्रेसका सभापति गगनकुमार थापाले सरकार विधिसम्मत प्रक्रिया र शक्ति पृथक्करणको सीमाभन्दा बाहिर जान थालेको आरोप लगाएका छन्।

आइतबार पार्टी केन्द्रीय कार्यालयमा बसेको केन्द्रीय कार्यसमिति बैठकमा बोल्दै थापाले कार्यपालिकाले न्यायपालिका, संवैधानिक निकाय र संसद्को अधिकारलाई समेत बेवास्ता गर्न थालेको दाबी गरे।

उनले सरकारमा ‘शासकीय अराजकता’ बढेको भन्दै त्यसविरुद्ध खबरदारी गर्नु काँग्रेसको जिम्मेवारी भएको बताए। गृहमन्त्री सुदन गुरुङको सम्पत्ति छानबिन प्रतिवेदन सार्वजनिक नगरिएको विषयमा समेत उनले आपत्ति जनाए। प्रधानमन्त्री बालेन्द्र साहले भनेको ‘एक्सप्रेस वे’को उदाहरण दिँदै उनले सरकार तीव्र गतिमा अघि बढ्न सक्ने भए पनि ‘लेन मिच्न नहुने’ टिप्पणी गरे।