वर्षा–पहिरोको कहर: मुख्य राजमार्ग अवरुद्ध, ५६ स्थानमा उच्च सतर्कता

देशका विभिन्न भागमा भइरहेको अविरल वर्षा, बाढी र पहिरोका कारण प्रमुख राजमार्गहरू अवरुद्ध भएका छन्। सडक अवरुद्ध हुँदा सयौँ यात्रु बीच बाटोमै अलपत्र परेका छन् भने प्रभावित क्षेत्रमा उच्च सतर्कता अपनाउन आग्रह गरिएको छ।

गृह मन्त्रालयको विपद् पोर्टलका अनुसार पछिल्लो एक सातामा (असार २२ देखि २९ गतेसम्म) देशभर बाढी, भारी वर्षा र सडक अवरोधसँग सम्बन्धित ५६ वटा घटना दर्ता भएका छन्।

सडक विभाग र नेपाल प्रहरीका अनुसार कोशी, वागमती, गण्डकी र लुम्बिनी प्रदेशका अधिकांश प्रमुख सडकखण्डमा पहिरो र बाढीका कारण यातायात प्रभावित भएको छ। अरनिको राजमार्गदेखि मदन भण्डारी राजमार्गसम्मका विभिन्न खण्ड पूर्ण रूपमा अवरुद्ध छन्।