विदेशी सम्बन्धनका कलेज नियमन गर्न नयाँ नियमावली स्वीकृत

सरकारले विदेशी सम्बन्धनका नाममा सञ्चालन भइरहेका कलेजको गुणस्तर सुधार र प्रभावकारी नियमनका लागि विदेशी शैक्षिक कार्यक्रम (सञ्चालन र नियमन) नियमावली, २०८३ स्वीकृत गरेको छ।

मन्त्रिपरिषद्को हिजोको बैठकले स्वीकृत गरेको नियमावलीअनुसार अब सम्बन्धन दिने विदेशी विश्वविद्यालय विश्वका उत्कृष्ट १,००० विश्वविद्यालयभित्र परेको हुनुपर्नेछ। साथै, सम्बन्धित कलेजले क्वालिटी एसुरेन्स एन्ड एक्रिडिटेसन (क्यूएए) का दुई चरण पूरा गरेको हुनुपर्ने व्यवस्था गरिएको छ।

विद्यार्थी भर्ना कोटा कलेजको पूर्वाधार, शैक्षिक क्षमता र जनशक्तिका आधारमा निर्धारण गरिनेछ। नयाँ मापदण्ड हाल सञ्चालनमा रहेका विदेशी सम्बन्धन प्राप्त कलेजमा पनि लागू हुनेछ।

सरकारले मापदण्ड पूरा नगर्ने कलेजलाई सुधारका लागि समय दिने, त्यसपछि पनि सुधार नभए सम्बन्धन नवीकरण रोक्ने, नयाँ भर्ना बन्द गर्ने वा कानुनी कारबाही गर्ने व्यवस्था गरेको छ।