बेरुजु छलफल उपसमिति गठन गर्ने विषयमा सहमति जुट्न नसकेपछि सार्वजनिक लेखा समितिको बैठक स्थगित भएको छ।
मंगलबार बिहान बसेको समितिको बैठकमा आन्तरिक कार्यविधि पारित गर्ने र बेरुजु छलफल उपसमिति गठन गर्ने कार्यसूची रहे पनि उपसमितिको संयोजक चयनमा दलहरूबीच सहमति हुन नसकेपछि बैठक दिउँसो ३ बजे बस्ने गरी स्थगित गरिएको हो।
सार्वजनिक लेखा समितिले पाँच वटा उपसमिति गठन गर्ने तयारी गरेको छ। प्रस्तावित उपसमितिमा अर्थ सुशासन उपसमिति, राज्य सुरक्षा, न्याय, कानुन र प्रशासन उपसमिति, भौतिक पूर्वाधार, प्राकृतिक स्रोत र वातावरण उपसमिति, आर्थिक उत्पादन, विज्ञान र मानव पुँजी उपसमिति तथा सामाजिक न्याय, कल्याण र समावेशीकरण उपसमिति रहेका छन्।
सबै उपसमितिको संयोजकमा राष्ट्रिय स्वतन्त्र पार्टी (रास्वपा) ले दाबी गरेपछि अन्य विपक्षी दलहरूले विरोध जनाएका छन्। संयोजक चयनको विषयमा सहमति नजुट्दा समिति बैठक निष्कर्षविहीन बनेको हो।
समितिको बैठक मंगलबार दिउँसो ३ बजे पुनः बस्ने तय भएको छ।
Discussion about this post