कञ्चनपुर । कुमारी बैंक लिमिटेड (चाँदनी दोधारा शाखा) ले आफ्नो संस्थागत सामाजिक उत्तरदायित्व कार्यक्रम अन्तर्गत सहयोग हस्तान्तरण गरेको छ। बैंकले दोधारा चाँदनीस्थित श्री भानु बहुमुखी क्याम्पसलाई एक थान सेनेटरी प्याड भेन्डिङ मेसिन र एक थान सेनेटरी प्याड डिस्पोजल मेसिन सहयोग उपलब्ध गराएको हो।
कुमारी बैंक लिमिटेड चाँदनी दोधारा शाखाका शाखा प्रबन्धक (ब्रान्च मेनेजर) नरेन्द्र सिंह भण्डारीका अनुसार क्याम्पसमा अध्ययनरत छात्राहरूको महिनावारी स्वास्थ्य र स्वच्छतालाई ध्यानमा राख्दै बैंकले यो सहयोग पुर्याएको हो। उहाँले ‘कवच’ ब्राण्डका यी मेसिनहरूको उपलब्धतासँगै अब छात्राहरूले क्याम्पस समयमा सहजै सेनेटरी प्याड प्राप्त गर्न सक्ने बताउनुभयो। यसका साथै प्रयोग भइसकेका प्याडहरूलाई सुरक्षित र वातावरणमैत्री तरिकाले विसर्जन (डिस्पोज) गर्न पनि यसले ठूलो मद्दत पुर्याउने उहाँको भनाइ थियो।
सहयोग हस्तान्तरण कार्यक्रममा बैंकका शाखा प्रबन्धक भण्डारी, बैंकका अन्य प्रतिनिधिहरू, क्याम्पस प्रशासनका पदाधिकारीहरू, प्राध्यापक तथा विद्यार्थीहरूको उपस्थिति रहेको थियो। बैंकको यस प्रशंसनीय कार्यले छात्राहरूको शैक्षिक निरन्तरता, नियमितता र स्वास्थ्यमा सकारात्मक प्रभाव पार्ने भन्दै क्याम्पस परिवारले कुमारी बैंकप्रति विशेष आभार प्रकट गरेको छ।
Discussion about this post