कञ्चनपुर । कञ्चनपुरको बेलडाँडी गाउँपालिकाको १९औँ गाउँसभाले आगामी आर्थिक वर्ष २०८३/०८४ का लागि ४१ करोड ६९ लाख ७९ हजार रुपैयाँ बराबरको बजेट सार्वजनिक गरेको छ । उत्पादन वृद्धि, रोजगारी सिर्जना, सेवा प्रवाहमा सहजता तथा दिगो विकासलाई केन्द्रमा राख्दै गाउँपालिकाले बजेट ल्याएको हो ।
गाउँपालिका अध्यक्ष तथा गाउँसभा अध्यक्ष हरिशचन्द्र राना ले कृषि, शिक्षा, स्वास्थ्य, रोजगारी र पूर्वाधार विकासलाई आगामी वर्षको मुख्य प्राथमिकतामा राखिएको बताउनुभयो । उहाँले प्रस्तुत बजेटले समृद्ध बेलडाँडी निर्माणको दीर्घकालीन आधार तयार गर्ने विश्वास व्यक्त गर्नुभयो ।
गाउँसभामा सदस्य सचिव तथा प्रमुख प्रशासकीय अधिकृत रामकृष्ण विकले नीति तथा कार्यक्रम प्रस्तुत गर्नुभएको थियो भने गाउँपालिकाकी उपाध्यक्ष शान्ति नाथद्वारा प्रस्तुत बजेट वडा नं. ५ का वडाध्यक्ष इन्द्रबहादुर खड्काले वाचन गर्नुभएको थियो ।
आगामी आर्थिक वर्षदेखि नापी तथा मालपोत सेवा बेलडाँडी गाउँपालिकाबाटै सञ्चालन गर्ने तयारी गरिएको गाउँसभा अध्यक्ष रानाले जानकारी दिनुभयो । यसबाट स्थानीयवासीलाई सेवा प्राप्त गर्न सहज हुने अपेक्षा गरिएको छ ।
आर्थिक विकासतर्फ ७४ लाख रुपैयाँ विनियोजन गरिएको छ । रोजगार सेवा केन्द्रमार्फत सूचीकृत बेरोजगार नागरिकलाई न्यूनतम १०० दिनको रोजगारी सुनिश्चित गर्न १० लाख रुपैयाँ छुट्टाइएको छ । कृषि आधुनिकीकरण, उत्पादन वृद्धि तथा व्यवसायीकरणका लागि २४ लाख रुपैयाँ विनियोजन गरिएको छ ।
पशु स्वास्थ्य सेवा, औषधि वितरण, महामारी नियन्त्रण, निःशुल्क खोप तथा कृत्रिम गर्भाधान कार्यक्रम सञ्चालनका लागि २० लाख रुपैयाँ बजेट व्यवस्था गरिएको छ ।
सामाजिक विकासतर्फ ३ करोड १९ लाख रुपैयाँ विनियोजन गरिएको छ । स्वास्थ्य सेवा सुधारका लागि गाउँपालिकाले थप १ करोड ४५ लाख रुपैयाँ छुट्टाएको छ भने शिक्षा क्षेत्रको गुणस्तर सुधार र शैक्षिक पहुँच विस्तारका लागि पनि १ करोड ४५ लाख रुपैयाँ विनियोजन गरिएको छ ।
पूर्वाधार विकासतर्फ सङ्घीय तथा प्रदेश सरकारसँगको साझेदारीमा सञ्चालन हुने योजनाका लागि करिब ५ करोड रुपैयाँ विनियोजन गरिएको छ । गाउँपालिकाका गौरवका आयोजनाअन्तर्गत कालोपत्रे सडक निर्माण र १५ शय्याको अस्पताल निर्माणलाई प्राथमिकता दिइएको छ । साथै खेलकुद विकासका लागि १८ लाख रुपैयाँ बजेट छुट्टाइएको छ ।
गाउँपालिका अध्यक्ष रानाले प्रस्तुत बजेटलाई बेलडाँडीको आर्थिक रूपान्तरणको मार्गचित्रको रूपमा व्याख्या गर्दै उत्पादन, रोजगारी, शिक्षा, स्वास्थ्य र पूर्वाधार विकासमा केन्द्रित रहेको बताउनुभयो ।
गाउँसभाको अर्को बैठक असार १६ गते बस्ने गरी स्थगित गरिएको गाउँपालिकाका प्रवक्ता गजबहादुर बिष्टले जानकारी दिनुभयो ।
Discussion about this post