बाजुरा । अविरल वर्षासँगै गएको पहिरोका कारण तीन दिनदेखि अवरुद्ध बाजुराको मुख्य साँफे–मार्तडी सडकखण्ड मंगलबार बिहानदेखि पुनः सञ्चालनमा आएको छ। शनिबारदेखि परेको वर्षाका कारण विभिन्न स्थानमा पहिरो खस्दा मार्तडी जोड्ने सडक पूर्ण रूपमा अवरुद्ध भएको थियो।
बडीमालिका नगरपालिकाअन्तर्गत कारागार मोड, सेलागाड, सुवाकाँध, राप्का र बिरेखोलालगायतका क्षेत्रमा सडक माथिबाट ठूलो पहिरो खसेको थियो। सडक विभागका दुई वटा जेसीबी र प्राविधिक टोलीको निरन्तर प्रयासपछि पहिरो पन्छाएर यातायात सञ्चालनमा ल्याइएको प्रमुख जिल्ला अधिकारी डोरेन्द्र निरौलाले जानकारी दिए।
सडक खुलेसँगै तीन दिनदेखि रोकिएका साना सवारीसाधन र यात्रुहरू गन्तव्यतर्फ लागेका छन्। भने कारागार मोड नजिकै खसेको ठूलो ढुंगा हटाउने काम जारी रहेकाले बस र ट्रकजस्ता ठूला सवारीसाधनको आवागमन अझै सहज हुन सकेको छैन।
तत्कालका लागि सडक सञ्चालनमा आए पनि पुनः भारी वर्षा भए पहिरो खस्ने जोखिम कायमै रहेको जिल्ला प्रशासन कार्यालय बाजुराले जनाएको छ।
यसैबीच, शनिबार रातिको पहिरोले राष्ट्रिय प्रसारण लाइनका करिब ३२ वटा विद्युत् पोल ढालेपछि बाजुरामा विद्युत् सेवा अवरुद्ध भएको छ। ३३ केभी लाइनका धेरै पोलमा क्षति पुगेकाले पूर्ण रूपमा विद्युत् सेवा सञ्चालन गर्न समय लाग्ने भए पनि मंगलबार साँझसम्म ११ केभी लाइन मर्मत गरी मार्तडी क्षेत्रमा विद्युत् आपूर्ति गर्ने तयारी गरिएको छ।
नेपाल विद्युत् प्राधिकरण बाजुराका अनुसार नेपाली सेना, नेपाल प्रहरी, सशस्त्र प्रहरी र प्राधिकरणका प्राविधिक टोलीले ढलेका पोल गाड्ने काम सम्पन्न गरेका छन्। अहिले चुँडिएका तार जोड्ने तथा लाइन मर्मतको काम भइरहेको छ।
सडक र विद्युत् सेवा तीन दिनसम्म अवरुद्ध हुँदा बाजुराको जनजीवन प्रभावित भएको थियो भने सरकारी तथा गैरसरकारी कार्यालयका सेवा प्रवाहसमेत प्रभावित बनेका थिए।
Discussion about this post