राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत चुनावी प्रक्रिया अघि बढेसँगै महाधिवेशनस्थल परिसरमा प्रचारप्रसारले तीव्रता पाएको छ ।
रास्वपाको केन्द्रीय सदस्य पदका लागि पहिलो चरणमा हुन गइरहेको चुनावमा उम्मेदवारी दिने नेता एवम् तिनका प्रस्तावक, समर्थक, शुभेच्छुक र कार्यकर्ताहरू आज बिहानैदेखि आ–आफ्नो पक्षमा मत माग्न व्यस्त देखिन्छन् ।
उम्मेदवारी घोषणा गर्ने सरकारका मन्त्रीसहित सांसद तथा नेता, कार्यकर्ता प्रचारप्रसारमा व्यस्त छन् । केन्द्रीय निर्वाचन आयोगबाट उम्मेदवारको सूची सार्वजनिक भइसकेकाे छैन ।
बिहानैदेखि महाधिवेशन परिसरमा उम्मेदवारी घोषणा गरेका मन्त्री र सांसदका शुभेच्छुक तथा कार्यकर्ता प्रचारप्रसारका सामग्री बाँड्दै मत मागिरहेका देखिन्छन् । उम्मेदवारको सङ्ख्या धेरै भएको र सबैलाई चिन्न नसक्ने भएकाले मत माग्नुपरेको उनीहरूको भनाइ छ ।
रास्वपाकाे ९९ सदस्यीय केन्द्रीय सदस्य पदका लागि विद्युतीय मतदान प्रक्रियामार्फत हुने चुनावमा ४०० भन्दा धेरै जनाकाे उम्मेदवारी परेको छ । खुलातर्फको भन्दा पनि ‘क्लस्टर’ बाट धेरै सदस्य निर्वाचित हुने प्रावधान भएकाले चुनाव थप पेचिलो बनेको देखिन्छ ।
पार्टीको सभापतिमा रवि लामिछाने निर्विरोध हुनुभएको छ । आजै राति अबेरसम्म केन्द्रीय सदस्यका लागि पहिलो चरणको चुनाव सम्पन्न गरेर दोस्रो चरणमा पदाधिकारीको चुनाव गर्ने तयारी छ ।
दोस्रो चरणमा १ उपसभापति, २ महामन्त्री र ३ सहमहामन्त्री गरी ६ जनाको चुनाव हुनेछ ।
Discussion about this post