कञ्चनपुर । राष्ट्रिय स्वतन्त्र पार्टी (रास्वपा) को प्रथम महाधिवेशनको बन्दसत्र आज सुरु भएको छ। केहीबेरअघि सभापति लामिछानेले घण्टी बजाएर बन्दसत्रको औपचारिक सुरुवात गर्नुभएको हो।
बन्दसत्रमा पार्टीका वरिष्ठ नेताहरू तथा अधिकांश प्रतिनिधिहरूको उपस्थिति रहेको छ। तर प्रधानमन्त्री बालेन्द्र (बालेन) शाह भने कार्यक्रममा उपस्थित हुनुभएको छैन।
बन्दसत्रलाई सम्बोधन गर्दै सभापति लामिछानेले नागरिकले दिएको विश्वासलाई परिणाममा बदल्नुपर्नेमा जोड दिनुभयो।
महाधिवेशनअन्तर्गत नयाँ नेतृत्व चयनका लागि भोलि निर्वाचन हुने भएको छ। केन्द्रीय निर्वाचन आयोगका प्रमुख भुवन केसीका अनुसार बन्दसत्र सम्पन्न भएपछि मतदान प्रक्रिया अघि बढाइनेछ।
निर्वाचनका लागि ८० वटा विद्युतीय मतदान उपकरण प्रयोग गरिनेछ। साथै, महाधिवेशनमा प्रत्यक्ष उपस्थित हुन नसकेका प्रवासका प्रतिनिधिहरूका लागि रास्वपाले आफ्नै मोबाइल एपमार्फत मतदानको व्यवस्था गरेको छ।
यस महाधिवेशनमा १ सभापति र ९९ जना केन्द्रीय सदस्य चयन गरिने निर्वाचन आयोगले जनाएको छ। उम्मेदवारका प्रस्तावक र समर्थकलाई स्वयं उम्मेदवार बन्न नपाउने व्यवस्था पनि गरिएको छ।
Discussion about this post