निर्धारित समय बित्दा पनि सुरु भएन रास्वपाको बन्दसत्र

चितवनमा जारी राष्ट्रिय स्वतन्त्र पार्टी (रास्वपा) को पहिलो महाधिवेशनअन्तर्गत आज बिहान साढे ८ बजे सुरु हुने तय भएको बन्दसत्र निर्धारित समयमै सुरु हुन सकेको छैन।

सुरुमा प्राविधिक कारणले केही ढिलाइ भएको बताइए पनि पछि महाधिवेशन प्रतिनिधिको नामावली सच्याउने काम जारी रहेकाले बन्दसत्र सुरु हुन नसकेको रास्वपाका नेताहरूले बताएका छन्।

सञ्चारकर्मीसँग कुरा गर्दै रास्वपाका प्रवक्ता मनिष झाले मधेश प्रदेशका केही प्रतिनिधिको नाम छुटेकाले उनीहरूलाई समावेश गर्ने गृहकार्य भइरहेको जानकारी दिनुभयो। उहाँका अनुसार प्रतिनिधिको सङ्ख्या पनि बढेको छ।

आज बिहानसम्म करिब ४ हजार ३०० प्रतिनिधि महाधिवेशनस्थल पुगेका छन् भने मधेश प्रदेशका थप प्रतिनिधि समावेश गर्ने प्रक्रिया जारी रहेको प्रवक्ता झाले बताउनुभयो।

उहाँले प्रतिनिधि व्यवस्थापन र अन्य प्राविधिक कारणले महाधिवेशनको कार्यतालिका प्रभावित हुन सक्ने भन्दै महाधिवेशन एक दिन लम्बिन सक्ने संकेत गर्नुभयो। यसअघि बसेको केन्द्रीय समिति बैठकमा पनि विभिन्न कारणले कार्यक्रम ढिला हुन सक्ने विषयमा छलफल भएको र एक दिन थपिनुलाई स्वाभाविक रूपमा लिइएको उहाँको भनाइ छ।