राष्ट्रिय स्वतन्त्र पार्टीकी सांसद निशा डाँगीले झापाको मेचीनगर–१ बाहुनडाँगी क्षेत्रमा जंगली हात्तीले मच्चाएको विनाश र त्यसबाट भएको जनधनको क्षतिप्रति सरकारको ध्यानाकर्षण गराएकी छिन्।
सोमबार बसेको प्रतिनिधिसभाको आकस्मिक समयमा बोल्दै सांसद डाँगीले दशकौँदेखि जारी रहेको हात्ती–मानव द्वन्द्व समाधानका लागि सरकारले ठोस कदम चाल्नुपर्ने माग गरिन्।
उनले आइतबार बिहान बाहुनडाँगीमा आफ्नै घरबाहिर फूल टिप्ने क्रममा ६२ वर्षीय पद्म पौडेलको हात्तीको आक्रमणबाट मृत्यु भएको घटनाप्रति दुःख व्यक्त गरिन्। साथै सोमबार बिहान मात्रै मेचीनगर–१ का किसानहरूको करिब ३ बिघा मकैबाली हात्तीले नष्ट गरेको जानकारी पनि सदनमा दिइन्।
सांसद डाँगीका अनुसार बाहुनडाँगी क्षेत्रमा करिब ३५ देखि ४० वर्षदेखि हात्तीको समस्या निरन्तर रहँदै आएको छ। उनले बिहान–साँझ मात्र नभई रातको समयमा समेत स्थानीय बासिन्दा त्रासमा बाँच्न बाध्य भएको बताइन्।
प्रत्येक साँझ भारततर्फबाट ४० देखि ५० को हाराहारीमा हात्ती नेपाल प्रवेश गरी रातभरि बाली तथा बस्तीमा क्षति पुर्याउने र बिहान पुनः फर्किने गरेको उनले उल्लेख गरिन्। यस कारण किसानहरूले वर्षभरि गरेको मेहनत क्षणभरमै नष्ट हुने अवस्था रहेको उनको भनाइ छ।
सांसद डाँगीले यति ठूलो समस्या भए पनि बाहुनडाँगीवासीले राज्यको उपस्थिति महसुस गर्न नसकेको गुनासो समेत व्यक्त गरिन्।
Discussion about this post