परराष्ट्रमन्त्री शिशिर खनाल चार दिने औपचारिक भ्रमणका लागि आज बिहान चीनको राजधानी बेइजिङ प्रस्थान गर्नुभएको छ। हालै भारतको तीन दिने भ्रमण सकेर स्वदेश फर्किनुभएका मन्त्री खनाल चीनका विदेशमन्त्री वाङ यीको निमन्त्रणामा चीन जानुभएको हो।
परराष्ट्र मन्त्रालयका अनुसार भ्रमणका क्रममा मन्त्री खनालले भोलि चिनियाँ समकक्षी वाङ यी सँग द्विपक्षीय वार्ता गर्नुहुनेछ। वार्तामा नेपाल–चीन सम्बन्धलाई थप सुदृढ बनाउने तथा आपसी सहयोग विस्तार गर्ने विषयमा छलफल केन्द्रित रहनेछ।
यसैगरी, मन्त्री खनालले चीनका उच्चस्तरीय राजनीतिक नेतृत्वसँग शिष्टाचार भेटवार्ता गर्नुहुनेछ। उहाँले बेइजिङमा आयोजना हुने लगानी सम्मेलनमा समेत सहभागिता जनाउने कार्यक्रम रहेको छ। उक्त सम्मेलन नेपाली दूतावासको आयोजनामा नेपालमा विदेशी लगानी प्रवर्द्धन गर्ने उद्देश्यसहित आयोजना गरिएको हो।
भ्रमणका क्रममा मन्त्री खनालले चिनियाँ व्यापारिक समुदायसँग अन्तरक्रिया गर्ने तथा नेपाली समुदायसँग भेटघाट गर्ने कार्यक्रम पनि तय भएको छ। परराष्ट्र मन्त्रालयका अनुसार उहाँको सम्मानमा नेपाली दूतावासले आयोजना गर्ने स्वागत समारोहमा समेत मन्त्री खनाल सहभागी हुनुहुनेछ।
मन्त्री खनाल असार ३ गते स्वदेश फर्किने कार्यक्रम रहेको छ। यसअघि उहाँले जेठ २२ देखि २४ गतेसम्म भारतको तीन दिने औपचारिक भ्रमण सम्पन्न गर्नुभएको थियो। यसपटकको चीन भ्रमणमा लिपुलेक क्षेत्र हुँदै भारत र चीनले व्यापारिक मार्ग सञ्चालन गरेको विषय समेत नेपालले उठाउन सक्ने अनुमान गरिएको छ।
Discussion about this post