विपक्षीसँग प्रधानमन्त्रीलाई सोध्ने प्रश्न नै छैनन् : सरकारका प्रवक्ता

सरकारका प्रवक्ता तथा शिक्षा एवं खेलकुदमन्त्री सस्मित पोखरेलले प्रधानमन्त्री बालेन्द्र शाहलाई संसदमा जान कुनै अफ्ठ्यारो नरहेको बताएका छन्।
मन्त्रिपरिषद् बैठकका निर्णय सार्वजनिक गर्ने क्रममा पत्रकारहरूसँग कुरा गर्दै प्रवक्ता पोखरेलले आवश्यकता अनुसार प्रधानमन्त्री संसदमा उपस्थित हुने जानकारी दिए। यसअघि पनि आवश्यक ठानेर प्रधानमन्त्री संसदमा उपस्थित भइसकेको उल्लेख गर्दै उनले विपक्षीसँग प्रधानमन्त्रीलाई सोध्ने प्रश्न नै नभएको दाबी गरे।
प्रधानमन्त्री शाहले सीमासम्बन्धी विषयमा संसदमा दिएको अभिव्यक्तिबारे जवाफ दिनुपर्ने माग गर्दै विपक्षी दलहरूले लगातार संसद् अवरुद्ध गर्दै आएका छन्।
प्रवक्ता पोखरेलले अर्थमन्त्री डा. स्वर्णिम वाग्लेमाथि लागेका आरोपको समेत बचाउ गरेका छन्। उनले अर्थमन्त्रीले मेहनतपूर्वक बजेट ल्याएको र करका दर हेरफेरसम्बन्धी विषय मन्त्रिपरिषद्मा नउठेको बताए।
आर्थिक विधेयक संसदमा पेश भइसकेपछि करका दर परिवर्तन गरिएको विषयलाई लिएर विवाद चर्किएको छ। विपक्षी दलहरूले स्वार्थ समूहको प्रभावमा परेर करका दर परिवर्तन गरिएको आरोप लगाउँदै छानबिनको माग गरिरहेका छन्।