नेपालगन्ज – जलवायु परिवर्तन सम्बन्धी विद्यालयस्तरीय सचेतना कार्यक्रमअन्तर्गत बैजनाथ गाउँपालिकामा सिकाइ साझेदारी तथा समीक्षा बैठक सम्पन्न भएको छ।
बैजनाथ गाउँपालिकाको सहयोग तथा बास नेपालको आयोजनामा भएको कार्यक्रममा सहभागी प्रधानाध्यापकहरूले जलवायु परिवर्तन सचेतना कार्यक्रमले छोटो समयमै सकारात्मक उपलब्धि हासिल गरेको बताएका छन्।
कार्यक्रममा बोल्दै श्री सूर्योदय माध्यमिक विद्यालय चिसापानीका प्रधानाध्यापक दीपकबहादुर शाहीले जलवायु सचेतना कार्यक्रम प्रभावकारी रहेको बताए। उनले जलवायु परिवर्तनका विषयमा विद्यार्थीसँगै अभिभावकलाई समेत सचेत बनाउन आवश्यक रहेको उल्लेख गरे।
सहभागी प्रधानाध्यापकहरूले विद्यालय सरसफाइ, हरियाली प्रवर्द्धन, शुद्ध खानेपानीलगायत आधारभूत आवश्यकताका विषयमा स्थानीय तहले विशेष ध्यान दिनुपर्नेमा जोड दिएका थिए। बैठकका क्रममा कार्यक्रममा सहभागी विद्यार्थीहरूले पनि आफ्ना अनुभव तथा सिकाइ आदानप्रदान गरेका थिए।
बास नेपालकी केन्द्रीय महासचिव कल्पना अधिकारीले सहजीकरण गरेको कार्यक्रममा संस्थाका निर्देशक हेमराज भट्टले जलवायु परिवर्तन सम्बन्धी सचेतना कार्यक्रमको उद्देश्य, उपलब्धि, सिकाइ, चुनौती तथा आगामी योजनाबारे प्रस्तुतीकरण गरेका थिए।
बैठकमा बैजनाथ गाउँपालिका वडा नं. १ स्थित श्री सूर्योदय माध्यमिक विद्यालय, वडा नं. ५ का श्री सुन्दर आधारभूत विद्यालय, श्री सिंह भवानी आधारभूत विद्यालय, श्री नेरा माध्यमिक विद्यालय गुरुवागाउँ तथा वडा नं. ७ स्थित श्री नेरा माध्यमिक विद्यालय पेडारीका प्रधानाध्यापक, सम्पर्क शिक्षक र जलवायु क्लबमा आबद्ध विद्यार्थीहरूको सहभागिता रहेको थियो।
Discussion about this post