स्रोत अभावका कारण लामो समयदेखि प्रभावित स्वास्थ्य बिमा भुक्तानी प्रक्रिया सहज बन्दै गएको छ। सरकारले पछिल्लो हप्तामात्रै स्वास्थ्य बिमाबापत एक अर्ब तीन करोड रुपैयाँ विभिन्न स्वास्थ्य संस्थाहरूलाई निकासा गरेको छ।
निकासा गरिएको रकमबाट १५५ सरकारी, २५ सामुदायिक र ३७ निजी अस्पताल लाभान्वित भएका छन्। अघिल्लो वर्षदेखिको बक्यौता रकमसमेत समेटेर चरणबद्ध रूपमा भुक्तानी सुरु गरिएपछि स्वास्थ्य बिमा कार्यक्रमसँग सम्बन्धित समस्या क्रमशः समाधानतर्फ उन्मुख भएको छ।
स्वास्थ्य बीमा बोर्डका वरिष्ठ मेडिकल सुपेरिटेन्डेन्ट डा. पवन शाहका अनुसार यसपटक सरकारी अस्पतालसँगै निजी स्वास्थ्य संस्थामा उपचार गराएका बिमितहरूले पनि भुक्तानी पाएका छन्। यसअघि सीमित स्रोतका कारण सरकारी अस्पताललाई प्राथमिकता दिइएको थियो।
स्वास्थ्य बिमा कार्यक्रमको दिगोपन सुनिश्चित गर्न सरकारले चालु आर्थिक वर्षका लागि १५ अर्ब रुपैयाँ बजेट विनियोजन गरेको छ। साथै बिमा व्यवस्थापन, अस्पतालको सेवा परीक्षण र खरिद प्रक्रियामा निगरानी तथा नियमन थप कडा बनाइने जनाएको छ।
स्वास्थ्य तथा खाद्य स्वच्छता मन्त्री निशा मेहताले स्वास्थ्य बिमाजस्तो जनमुखी कार्यक्रमलाई निरन्तरता दिन बाँकी बक्यौता रकम क्रमशः भुक्तानी गरिने बताउनुभयो। भविष्यमा यस्ता समस्या दोहोरिन नदिन कार्यक्रमको प्रभावकारी अनुगमन र व्यवस्थापनमा विशेष ध्यान दिइने उहाँको भनाइ छ।
Discussion about this post