उत्तर अमेरिकी क्षेत्रमा आयोजना हुने २३ औँ संस्करणको विश्वकप फुटबलको सरगर्मी बढ्दै गएको छ । अमेरिका, मेक्सिको र क्यानडाको संयुक्त आयोजनामा हुने विश्वकप आगामी जेठ २८ गतेदेखि साउन ३ गतेसम्म सञ्चालन हुनेछ । प्रतियोगिताका खेलहरू अमेरिकाका ११, मेक्सिकोका ३ र क्यानडाका २ शहरमा हुनेछन् ।
यस पटकको विश्वकपमा चार पटकको विश्वविजेता इटाली भने सहभागी हुनेछैन । युरोपियन छनोट चरण पार गर्न नसकेपछि इटाली विश्वकपबाट बाहिरिएको हो ।
इटालीका स्टार खेलाडीहरू इन्टर मिलानका एलेस्सान्द्रो बास्टोनी, निकोलो बारेला तथा पेरिस सेन्ट-जर्मेन (पीएसजी) का गोलकिपर जियानलुइजी डोनारुम्माले यसपटक राष्ट्रिय टोलीबाट विश्वकप खेल्न नपाउने भएका छन् ।
ब्राजिलपछिको सबैभन्दा सफल टोली मानिने इटालीले अहिलेसम्म १८ संस्करणमा सहभागिता जनाएको छ । सन् २००६ मा चौथोपटक विश्वकप जितेपछि इटालीले २०१० र २०१४ मा समूह चरणमै यात्रा समाप्त गरेको थियो ।
त्यसपछि सन् २०१८, २०२२ र २०२६ का विश्वकपका फाइनल चरणमा समेत इटालीले स्थान बनाउन सकेन । लगातार तीन संस्करण विश्वकपमा अनुपस्थित रहँदा इटालीको उपस्थिति शून्य जस्तै बनेको छ ।
विश्लेषहरूका अनुसार युरोपियन छनोटमा असफलता मुख्य कारण भए पनि घरेलु फुटबलमा फुटबलभन्दा टेनिसलाई बढी प्राथमिकता दिइनु पनि इटालीको प्रदर्शन कमजोर हुनुको एक कारण मानिन्छ ।
Discussion about this post