काठमाडौं । प्रतिनिधिसभामा अमर्यादित व्यवहार प्रदर्शन गर्ने सांसदहरूमाथि छानबिन गर्न समिति गठन गरिएको छ ।
सभामुख डोलप्रसाद अर्यालले सात दिनभित्र प्रतिवेदन बुझाउने कार्यादेशसहित छानबिन समिति गठन गरिएको जानकारी दिएका छन् ।
प्रतिवेदन प्राप्त भएपछि प्रतिनिधिसभा नियमावली, २०८३ को नियम ३३ को उपनियम ४ बमोजिम आवश्यक कारबाही प्रक्रिया अघि बढाइने सभामुखले बताएका छन् ।
उनका अनुसार प्रतिनिधिसभाका सचिव प्रकाश अधिकारीको संयोजकत्वमा समिति गठन गरिएको हो । समितिमा संघीय संसद् सचिवालयका आन्तरिक सेवा तथा योजना व्यवस्थापन महाशाखा प्रमुख तथा प्रविधि व्यवस्थापन महाशाखा प्रमुख सदस्य रहेका छन् ।
सभामुख अर्यालले जेठ १७ गतेको प्रतिनिधिसभा बैठकमा केही सांसदहरूले अव्यवस्था सिर्जना गर्नुका साथै अमर्यादित तथा आपत्तिजनक व्यवहार प्रदर्शन गरेको, भौतिक क्षति पुर्याएको विषयमा विस्तृत जानकारी प्राप्त भएको र सोसम्बन्धी मुचुल्का समेत तयार भइसकेकाले छानबिन समिति गठन गरिएको बताएका छन् ।
यस विषयमा सभामुख अर्यालले सोमबार संसद् सचिवालयका कर्मचारीहरूसँग परामर्श समेत गरेका थिए ।
आइतबार बसेको प्रतिनिधिसभा बैठकमा विपक्षी दलका सांसदहरूले वेल घेराउ गर्दै नाराबाजी गरेका थिए । त्यसक्रममा सांसदहरूबीच घम्साघम्सीसमेत भएको थियो ।
प्रतिनिधिसभाको बैठक प्रतिनिधिसभा नियमावली, २०८३ पारित गर्ने प्रक्रियामा रहेको बेला विपक्षी दलहरूले नियमावलीमाथि परेका संशोधन प्रस्तावबारे थप छलफलका लागि संसदीय समितिमा पठाउनुपर्ने माग गरेका थिए ।
तर दफावार छलफल सम्पन्न भइसकेको र प्रक्रिया अगाडि बढिसकेको भन्दै सभामुखले विरोधका बीच संशोधन प्रस्तावहरूलाई पास र फेलको प्रक्रियाबाट टुंग्याउँदै नियमावली पारित प्रक्रियालाई निरन्तरता दिएका थिए ।
Discussion about this post