काठमाडौँ – नेपाली कांग्रेसका नेता तथा पूर्वगृहमन्त्री रमेश लेखकले पार्टीको बृहत्तर हित र एकताका लागि सभापति गगन थापाले लचकता अपनाउनुपर्ने बताएका छन्। सुदूरपश्चिम प्रदेशस्तरीय भेलालाई धनगढीमा सम्बोधन गर्दै नेता लेखकले पार्टी एकताका लागि दुई पक्षबीच सहमति र समझदारी आवश्यक रहेको बताए। उनले निवर्तमान सभापति शेरबहादुर देउवाको योगदानलाई पार्टीले सम्मान गर्नुपर्ने धारणा राखे।
लेखकले विगतमा कांग्रेस विभाजनपछि गिरिजाप्रसाद कोइराला र शेरबहादुर देउवाले लचकता अपनाएर पार्टी एकता गरेको स्मरण गर्दै अहिलेको नेतृत्वले पनि त्यही उदाहरण पछ्याउनुपर्ने बताए। उनले देउवा उपचारका लागि विदेशमा रहेका कारण सुदूरपश्चिममा उहाँबिनै कार्यक्रम गर्नुपरेको उल्लेख गरे। साथै पार्टी एकताबद्ध भएर अघि बढ्नु अहिलेको मुख्य आवश्यकता रहेको उनको भनाइ थियो।
लेखकले कांग्रेस बलियो हुँदा राष्ट्रियता र लोकतन्त्र बलियो भएको तथा पार्टीभित्र विग्रह हुँदा लोकतन्त्र कमजोर बनेको इतिहास रहेको बताए। उनले आगामी १५औँ महाधिवेशन निष्पक्ष र एकताबद्ध ढंगले सम्पन्न गर्न सभापति गगन थापाले महत्त्वपूर्ण भूमिका खेल्नुपर्नेमा जोड दिए।
Discussion about this post