काठमाण्डौं – नेपालले साफ यू–२० च्याम्पियनसिपमा जितका साथ यात्रा सुरु गरेको छ। माल्दिभ्सको मालेमा सुरु भएको प्रतियोगिताको उद्घाटन खेलमा नेपालले भुटानलाई २–१ ले पराजित गर्दै महत्वपूर्ण ३ अंक हात पारेको हो।
नेपालको जितमा सुजन डंगोल र सुवास बमले गोल गर्दै टोलीलाई अग्रता दिलाए। भुटानका तर्फबाट ढेन्डुप गेल्टशेनले एक गोल फर्काए पनि त्यसले हार टार्न सकेन। खेलको १४औं मिनेटमै भुटानका थिन्ले एजर दोहोरो पहेँलो कार्डका कारण मैदान बाहिरिएपछि भुटान १० खेलाडीमा सीमित हुन पुगेको थियो।
यस जितसँगै नेपालले प्रतियोगितामा सकारात्मक सुरुआत गरेको छ। नेपाल समूह ‘ए’ मा आयोजक माल्दिभ्स, भुटान र श्रीलंकासँग रहेको छ। अर्को समूहमा भारत, पाकिस्तान र बंगलादेश रहेका छन्। राउन्ड रोबिन लिगपछि दुवै समूहका शीर्ष दुई टोली सेमिफाइनलमा प्रवेश गर्नेछन्। नेपालले आफ्नो दोस्रो खेल बुधबार श्रीलंकाविरुद्ध खेल्ने तालिका रहेको छ। उज्यालो अनलाईन
Discussion about this post