भक्तपुर – फागुन २१ गते हुने प्रतिनिधिसभा सदस्य निर्वाचनका लागि भक्तपुर क्षेत्र नम्बर २ का नेपाली कांग्रेसका उम्मेदवार कबिर राणाको प्रचारप्रसार तीव्र बनाइएको छ । बुधबार बिहान ७ देखि ९ बजेसम्म सूर्यविनायकका १० र मध्यपुर थिमीका ९ गरी कुल १९ वटै वडामा एकैसाथ सम्पर्क कार्यालय उद्घाटन गरिएको नेपाली कांग्रेस भक्तपुरले जनाएको छ ।
क्षेत्र नम्बर २ का लागि पूर्व सभापति गणेशमान चक्रधरको संयोजकत्वमा ८ हजार ७१ सदस्यीय मूल चुनाव परिचालन समिति गठन गरिएको छ । प्रचार समितिको संयोजकमा सुरेन्द्र केसी, आर्थिक समितिको जिम्मेवारी जिल्ला सहसचिव कृष्णमुरारी न्यौपानेलाई दिइएको छ । युवा तथा विद्यार्थी परिचालनका लागि तरुण दलका केन्द्रीय सदस्य राजु थापा संयोजक र नेविसंघ जिल्ला अध्यक्ष बद्री थापा सहसंयोजक तोकिएका छन् । महिला परिचालन समितिको संयोजकत्व जिल्ला उपसभापति उर्मिला वनले गर्नेछिन् ।
निर्वाचन आचारसंहिता अनुसार औपचारिक घरदैलो अभियान फागुन ४ गतेदेखि सुरु हुने भए पनि वडास्तरमा सम्पर्क कार्यालय स्थापना गरिएको हो । उम्मेदवार राणाले मतदाताको घर–घरमा पुगेर समस्या सुन्ने र समाधानमुखी एजेन्डासहित चाँडै घोषणापत्र सार्वजनिक गर्ने बताएका छन् । भदौ २३–२४ को जेनजी आन्दोलनपछि हुन लागेको निर्वाचनमा युवाका मुद्दालाई प्राथमिकतामा राख्ने र शान्ति तथा सुशासनमा सम्झौता नगर्ने उनको भनाइ छ ।
भक्तपुर निर्वाचन क्षेत्र नम्बर २ मा कुल ९८ हजार ३५६ मतदाता रहेका छन् । जसमा ४८ हजार ७४ पुरुष, ५० हजार २७७ महिला र ५ जना अन्य मतदाता छन् ।
Discussion about this post