काठमाडौं – नेपाली पुँजी बजारमा सर्वसाधारणबाट पुँजी जुटाउन ११७ कम्पनीले आईपीओ निष्कासनको अनुमति माग्दै नेपाल धितोपत्र बोर्ड (सेबोन) मा आवेदन दिएका छन्।
सेबोनका अनुसार ती कम्पनीले कुल ७१ अर्ब ४२ करोड २० लाख रुपैयाँबराबरको ५१ करोड ९ लाख ८१ हजार ९४६ कित्ता सेयर निष्कासन गर्न अनुमति मागेका हुन्।
बोर्डले कम्पनीहरूको आवेदन प्रक्रियालाई ६ चरणमा विभाजन गरेको छ। जसमध्ये ७६ कम्पनीको आवेदन प्रारम्भिक दर्ता चरणमा छ भने १९ कम्पनीको कागजात बोर्डमा पुगेको छ।
त्यस्तै, १० कम्पनीले बोर्डको टिप्पणीको जवाफ दिइसकेका छन् भने दुई कम्पनी अन्तिम समीक्षाको चरणमा पुगेका छन्। अन्तिम समीक्षामा रहेका आशुतोष इनर्जी र कान्तिपुर फर्मास्युटिकल्स ल्याबले क्रमशः १२ करोड र १७ करोड रुपैयाँबराबरको आईपीओ निष्कासन गर्न अनुमति मागेका छन्।
आईपीओ निष्कासनका लागि आवेदन दिएका कम्पनीमा सिमेन्ट, जलविद्युत्, होटल, स्टिल, बिमा तथा अन्य क्षेत्रका कम्पनी रहेका छन्।
यद्यपि, आवेदन दिँदैमा आईपीओ निष्कासनको अनुमति सुनिश्चित नहुने भएकाले लगानीकर्ताले कम्पनीको वित्तीय अवस्था, नाफा, ऋणभार र जोखिम अध्ययन गरेर मात्र लगानीसम्बन्धी निर्णय गर्नुपर्ने हुन्छ।
Discussion about this post