काठमाण्डौ – इङ्ग्ल्यान्डले २१ वर्षपछि पाकिस्तानी भूमिमा पहिलो पटक एकदिवसीय अन्तर्राष्ट्रिय क्रिकेटमा जित निकालेको छ। त्रिदेशीय शृङ्खलाअन्तर्गत लाहोरमा गएराति भएको खेलमा इङ्ग्ल्यान्डले श्रीलङ्कालाई ५५ रनले पराजित गरेको हो।
इङ्ग्ल्यान्डले दिएको ३८७ रनको लक्ष्य पछ्याएको श्रीलङ्का ४५ ओभर १ बलमा ३३१ रन बनाउँदै अलआउट भयो। श्रीलङ्काका पावन रत्नायकेले ११८ र कप्तान कुशल मेन्डिसले ८९ रन बनाए। इङ्ग्ल्यान्डका लियाम डसनले ४ विकेट लिए।
यसअघि पहिले ब्याटिङ गरेको इङ्ग्ल्यान्डले ५० ओभरमा ५ विकेट गुमाएर ३८६ रन बनाएको थियो। उसका बेन डकेटले १६७ र टम बान्टनले ७४ रन बनाए।
सन् २००५ पछि पाकिस्तानमा इङ्ग्ल्यान्डको यो पहिलो एकदिवसीय जित हो। त्रिदेशीय शृङ्खलामा लगातार तीन खेल हारेको इङ्ग्ल्यान्डका लागि यो सान्त्वना जित बनेको छ।
शृङ्खलाको उपाधिका लागि पाकिस्तान र श्रीलङ्काबीच भोलि फाइनल खेल हुनेछ।
Discussion about this post