काठमाडौं । सरकारले भोटेकोशी बाढीबाट प्रभावित रसुवा, नुवाकोट र धादिङका ४ हजार १०८ परिवारलाई प्रतिपरिवार ४५ हजार रुपैयाँका दरले नगद सहायता वितरण गरेको छ।
प्रधानमन्त्री तथा मन्त्रिपरिषद्को कार्यालयका अनुसार विश्व खाद्य कार्यक्रम (डब्ल्यूएफपी) बाट प्राप्त रकम ११ स्थानीय तहका प्रभावित परिवारलाई एकद्वार प्रणालीमार्फत वितरण गरिएको हो। तथ्याङ्क प्रमाणीकरण हुन बाँकी रहेका करिब १ हजार ४०० परिवारलाई पनि तीन दिनभित्र सहायता उपलब्ध गराउने सरकारको तयारी छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख धर्मराज उप्रेतीले बाढी प्रभावितलाई छ महिनाभित्र अस्थायी आवासमा स्थानान्तरण गर्ने र तीन वर्षभित्र स्थायी आवास निर्माण गरी हस्तान्तरण गर्ने लक्ष्य रहेको बताएका छन्।
रसुवा, नुवाकोट, गोरखा र धादिङका ५ हजार ११६ परिवारलाई स्थायी बसोबासको व्यवस्था गर्नुअघि अस्थायी आवास निर्माण गरिने उनको भनाइ छ।
सरकारले बाढीपीडित परिवारलाई पाँच महिनासम्म मासिक १५ हजार रुपैयाँ राहत दिने निर्णय गरेको छ। चार जनाभन्दा बढी सदस्य भएका परिवारलाई प्रत्येक थप सदस्यका लागि मासिक दुई हजार रुपैयाँका दरले थप रकम उपलब्ध गराइनेछ।
यसैबीच, रसुवाको टिमुरेस्थित नेपाल राष्ट्रिय आधारभूत विद्यालयका प्रधानाध्यापक फूर्वु दोर्जेले बाढीमा १० विद्यार्थी बेपत्ता भएको र विद्यालय भवन पूर्ण रूपमा नष्ट भएकाले पठनपाठन सञ्चालनमा अन्योल रहेको बताएका छन्। पत्रकार निराजन पौडेलले पनि बाढीमा परिवारका पाँच सदस्य गुमाउँदासमेत ५० दिन बितिसक्दा राहत नपाएको गुनासो गरेका छन्।
Discussion about this post