काठमाण्डौ — नेपाली राष्ट्रिय टी–२० क्रिकेट टोलीका कप्तान तथा अलराउन्डर दीपेन्द्र सिंह ऐरी यूएईमा हुने आईएल टी–२० को पाँचौँ संस्करणका लागि भएको खेलाडी अक्सनमा अन्सोल्ड भएका छन्।
दुबईस्थित आईसीसी एकेडेमीमा भएको अक्सनमा दीपेन्द्रले आफ्नो न्यूनतम मूल्य १० हजार अमेरिकी डलर, अर्थात् करिब १५ लाख ४३ हजार रुपैयाँ, तोकेका थिए।
अक्सनको १९औँ सेटमा दीपेन्द्रको नाम बोलाइए पनि कुनै पनि फ्रेन्चाइज टोलीले बोली लगाएनन्। त्यससँगै उनी अन्सोल्ड भएका हुन्।
दीपेन्द्र यसअघि आईएल टी–२० मा गल्फ जायन्ट्सबाट लगातार दुई सिजन आबद्ध भएका थिए। यद्यपि, दुवै सिजन उनले प्रतियोगितामा खेल्ने अवसर भने पाउन सकेनन्।
यसपटक पनि उनी गल्फ जायन्ट्सको सम्भावित रोजाइमा रहेका खेलाडीमध्ये थिए। अक्सनअघि सार्वजनिक सूचीमा उनलाई नेपालका क्याप्ड अलराउन्डरका रूपमा राखिएको थियो।
आईएल टी–२० को पाँचौँ संस्करण नोभेम्बर २१ देखि डिसेम्बर २० सम्म यूएईमा सञ्चालन हुँदैछ।
Discussion about this post