काठमाडौं । भोटेकोशी बाढीपछि हिन्दुकुश हिमालय क्षेत्रका देशहरू विपद् जोखिम न्यूनीकरणका लागि क्षेत्रीय सहकार्य बलियो बनाउन अघि बढेका छन्।
नेपालसहित भारत, चीन, बङ्गलादेश, भुटान, म्यानमार र पाकिस्तानलगायत देशले भविष्यमा हुन सक्ने विपद् व्यवस्थापनका लागि १० बुँदे कार्यसूची तयार गरेका छन्।
कार्यसूचीमा विपद्को पूर्वतयारी, पूर्वसूचना प्रणाली सुधार, तत्काल उद्धार तथा प्रतिकार्य र पुनर्लाभलाई प्राथमिकता दिइएको छ।
त्यस्तै, स्याटेलाइटमार्फत जोखिम क्षेत्रको अनुगमन, जोखिममा आधारित पूर्वानुमान, सूचना आदानप्रदान र साझा तथ्याङ्क पोर्टल निर्माण गर्ने योजना छ।
क्षेत्रीय प्रतिकार्य कोष स्थापना गर्ने, विपद् प्रतिरोधी पूर्वाधार निर्माणमा सहकार्य गर्ने तथा उच्च जोखिममा रहेका हिमाली क्षेत्रको अनुगमन बढाउने विषय पनि समेटिएको छ।
इसिमोडका अनुसार पछिल्ला विपद्का घटनाले क्षेत्रीय संयन्त्र थप बलियो बनाउनुपर्ने आवश्यकता देखाएको छ।
स्विट्जरल्यान्ड र बेलायतले पनि नेपाललाई पूर्वसूचना प्रणाली, जोखिम पहिचान तथा विपद् व्यवस्थापनमा सहयोग गर्ने प्रतिबद्धता जनाएका छन्।
क्षेत्रीय सहकार्यबाट भविष्यमा हुने विपद्को जोखिम घटाउनुका साथै समयमै सूचना, उद्धार र प्रतिकार्य प्रभावकारी बनाउने लक्ष्य राखिएको छ।
Discussion about this post