हेटौँडा — बागमती प्रदेशका मुख्यमन्त्री किरण थापामगरले प्रदेशभित्रका उद्योगको संरक्षण, सञ्चालन र लगानी सुरक्षाका लागि निजी क्षेत्रसँग सहकार्य गरेर अघि बढ्ने बताएका छन्।
मकवानपुर उद्योग वाणिज्य सङ्घले हेटौँडामा आयोजना गरेको स्वागत तथा सम्मान कार्यक्रममा मुख्यमन्त्री थापाले सञ्चालनमा रहेका उद्योगलाई व्यवस्थित बनाउन आवश्यक पूर्वाधार, बजेट र नीतिगत सहयोग गर्ने बताए।
हेटौँडा औद्योगिक क्षेत्रका केही उद्योग बन्द हुने अवस्थामा पुगेको र कच्चापदार्थको अभावलगायत समस्या देखिएको उल्लेख गर्दै उनले सञ्चालन गर्न सकिने तथा रुग्ण उद्योगका लागि आवश्यक नीति बनाइने बताए।
मुख्यमन्त्री थापाले प्रदेश सरकारले करको दर बढाउनुभन्दा करको दायरा विस्तार गर्ने नीति लिने बताए। उद्योग–व्यवसाय सञ्चालनमा देखिएका समस्या समाधानका लागि सरकार र निजी क्षेत्रबीच समन्वय आवश्यक रहेको उनको भनाइ छ।
नयाँ उद्योग स्थापनालाई प्राथमिकता दिँदै स्थानीयस्तरमै रोजगारी सिर्जना गर्नुपर्नेमा जोड दिँदै उनले कानुनी प्रक्रिया पूरा गरेर सञ्चालनमा आएका उद्योगलाई अनावश्यक अवरोध हुन नदिने बताए।
हालैको विपद्का कारण मुख्य सडक अवरुद्ध भएपछि वैकल्पिक सडक सञ्चालनमा प्रदेश सरकारले पहल गरेको उल्लेख गर्दै मुख्यमन्त्री थापाले प्रभावित क्षेत्रमा पुनःस्थापना र पुनर्निर्माणका लागि तीनै तहका सरकारबीच सहकार्य हुने बताए।
Discussion about this post