देशभर वर्षा जारी, आजदेखि झन् बढ्ने मौसमविद्को पूर्वानुमान

काठमाण्डौ — बंगालको खाडीमा विकसित न्यूनचापीय प्रणालीको प्रभावले देशका धेरै ठाउँमा वर्षा भइरहेको छ। लुम्बिनी र गण्डकीका केही क्षेत्रमा गएरातिदेखि नै मुसलधारे वर्षा भएको छ।

पछिल्लो २४ घण्टामा पाल्पामा १६० मिलिमिटर र कपिलवस्तुमा १२५ मिलिमिटरभन्दा बढी वर्षा भएको छ। मौसम पूर्वानुमान महाशाखाका अनुसार आजदेखि वर्षा अझ सक्रिय हुने र केही ठाउँमा मुसलधारेदेखि अति भारी वर्षा हुन सक्नेछ।

कोशी, बागमती, गण्डकी र लुम्बिनीका केही स्थानमा भारी वर्षाको सम्भावना छ। लगातारको वर्षाका कारण पहिरो, नदी तथा खोलामा बाढी र सडक तथा हवाई यातायात प्रभावित हुन सक्ने भएकाले आवश्यक सतर्कता अपनाउन महाशाखाले आग्रह गरेको छ।