कास्की । पोखरा अन्तर्राष्ट्रिय विमानस्थलबाट दुबई–पोखरा–दुबई रुटमा फ्लाई दुबईको नियमित उडान आजदेखि सुरु हुँदैछ।
विमानस्थल सञ्चालनमा आएको लामो समयपछि नियमित अन्तर्राष्ट्रिय उडान सुरु हुन लागेपछि पोखराका पर्यटन व्यवसायी, उद्योगी तथा सर्वसाधारण उत्साहित भएका छन्।
विमानस्थलका महाप्रबन्धक जगन्नाथ निरौलाका अनुसार अन्तर्राष्ट्रिय उडानका लागि आवश्यक पूर्वाधार तथा सेवा व्यवस्थापनको तयारी पूरा भएको छ। फ्लाई दुबईको विमान बुधबार साँझ ६ः१५ बजे पोखरा अवतरण गर्नेछ भने यात्रु लिएर साँझ ७ः१५ बजे दुबईका लागि प्रस्थान गर्नेछ।
अध्यागमन, भन्सार, कार्गोलगायतका सेवा सञ्चालनका लागि विमानस्थल पूर्ण रूपमा तयार रहेको निरौलाले बताए।
फ्लाई दुबईबाट पोखरा आउने तथा पोखराबाट दुबई जाने यात्रु र पर्यटकलाई पर्यटन व्यवसायीले खादा र मालासहित स्वागत तथा बिदाइ गर्ने तयारी गरेका छन्।
पोखरा विमानस्थल भन्सार कार्यालयले पनि राजस्व सङ्कलन, यात्रु जाँचपास तथा निकासी–पैठारीसम्बन्धी आवश्यक तयारी पूरा गरेको जनाएको छ।
दुबई विश्वको प्रमुख हवाई ट्रान्जिट हब भएकाले पोखरा–दुबई उडानले पोखरालाई अन्य अन्तर्राष्ट्रिय गन्तव्यसँग जोड्न सहयोग पुग्ने अपेक्षा गरिएको छ। विशेषगरी रोजगारी तथा अध्ययनका लागि दुबई जाने नेपाली यात्रुका लागि पोखराबाटै उडान सञ्चालन हुँदा सहज हुने पर्यटन व्यवसायीहरूको भनाइ छ।
उडान सञ्चालनलाई लक्षित गरी विमानस्थलको सुरक्षा व्यवस्थासमेत सुदृढ पारिएको छ। जिल्ला सुरक्षा समितिले विमानस्थलको निरीक्षण गरी आवश्यक सुरक्षा प्रबन्ध मिलाइएको जनाएको छ।
Discussion about this post